"Gəncə stadionunda hər şeyi yenilədikdən sonra tribunaların tam dolmasından danışmaq olar"

"Kəpəz"in prezidenti Mehman Allahverdiyev komandanın ev oyunlarını keçirdiyi Gəncə şəhər stadionunun durumundan danışıb. Azerisport.az saytına açıqlamasında o, bunları söyləyib:

"Hələ ki, gözləyirik və ümid edirik ki, bu mövsüm başa çatandan sonra vəziyyət düzələcək. Biz özümüz də bununla bağlı işlərimizi davam etdiririk. Yüksək vəzifələrdə çalışan insanlarla danışıqlar aparırıq. Yerli futbol infrastrukturunu yaxşılaşdırmaq istəyirik".

Allahverdiyevin sözlərinə görə, hələ komandanın UEFA Kubokunda iştirak etdiyi dövrdən qalan oturacaqlar artıq tamamilə yararsız vəziyyətdədir: "Heç olmasa oturacaqları normal vəziyyətə gətirə bilsəydik, indi arenaya 20 min azarkeş yerləşdirə bilərdik. Amma istənilən halda burada hər şeyi yeniləməyə ehtiyac var. Yalnız ondan sonra tribunanı doldurmaq haqda düşünmək olar".

"Stadionun yerləşdiyi ərazi də böyükdür, burada əlavə məşq meydançaları da tikmək olar. İnfrastrukturu yaxşılaşdırmaq üçün baza məsələsini həll etmək, stadionun yerləşdiyi ərazini də abadlaşdırmaq lazımdır".

"Kəpəz"in prezidenti "Ağsu" ilə son oyunla (2:3) bağlı yayılan xəbərlərə də münasibət bildirib: "Bəzi mətbuat orqanlarında xəbərlər yayılıb ki, guya mən bütün oyunboyu hakimləri təhqir etmişəm, oyundan sonra qohumlarımla, azarkeşlərlə meydana qaçaraq hakimlərlə haqq hesab çürütməyə çalışmışıq. Belə bir şey olmayıb. Biz oyundan sonra hakimlərlə görüşdük, normal şəkildə söhbət etdik, bir-birimizə uğurlar arzuladıq. Amma mətbuatda tam fərqli məlumatlar yer aldı. Belə məlumatları haradan tapıb çıxarırlar, bilmək olmur. Ümumiyyətlə, bunları niyə yazdıqları da məlum deyil. Ondan öncə Mingəçevirdə də 1:4 hesabıyla uduzmuşduq, hakimlikdən narazı qalmışdıq, amma artıq heç nə olmamışdı. Adi narazılıq idi".

"Mən jurnalistlərdən xahiş etmək istərdim ki, nəyisə yazmazdan öncə zəng etsinlər, dəqiqləşdirsinlər. Düzgün olmayan xəbərləri yazırlar, oxucular da daha onun doğru və yalan olduğunu bilmədən oxuyurlar".