Nikolas Kanales: Neftçi belə oynasa, finalda Qarabağa qalib gələ bilməyəcək

"Neftçi"nin hücumçusu Nikolas Kanalesin azerisport.az saytına müsahibəsi

- "Qarabağ"la oyun barədə nə deyə bilərsiniz?
- Fikrimcə, biz yaxşı oyun sərgilədik. Son üç matçda səkkiz qol buraxmışıq. Bax bunun üzərində düşünməyimiz lazımdır.

- Müdafiə xətti öz işinin öhdəsindən gələ bilmir?
- Mən bütün günahı müdafiə xəttinin üstünə atmaq fikrində deyiləm. Rəqibə orta sahədə də pressinq tətbiq etmək, top almaq olar.

- "Neftçi" iki qol buraxdıqdan sonra oynamağa başladı. Ondan öncə niyə zəif çıxış edirdiniz?
- Biz məhz rəqibin iki qoluna cavab verərkən ayıldıq. Amma artıq gec idi. Daha tez ayılmağımız lazım idi.

- Bir neçə tur öncə "Neftçi"nin ilk üçlükdə olacağına heç kim şübhə etmirdi. Amma 31-ci turdan sonra "Qəbələ"nin sizinlə eyni xala malik olduğunu görürük...
- Qarşıda daha dörd oyunumuz var. Bu oyunlarda kifayət qədər xal toplamaq olaraq ki, mükafatçılar sırasında yer alaq.

- Bu mövsüm "Neftçi" heç bir oyunda "Qarabağ"a qalib gələ bilmədi. Kubokun finalında uğursuz gedişata son qoyacağınıza inanırsınız?
- Son oyundakı kimi çıxış etsək, qələbə qazana bilməyəcəyik. Baxmayaraq ki, mən komandamızın bu rəqibə qalib gələcək gücdə olduğunu düşünürəm.

- Mövsümün sonunda klubla müqavilənizin müddəti başa çatacaq. Planlarınız necədir?
- Mənə hələ yeni müqavilə təklif etməyibər. Baxmayaraq ki, mənə başqa təkliflər var.