Roman Qriqorçuk: Qələbə seriyası haqda yox, daha yaxşı oynamaq haqda düşünməliyik
"Qəbələ"nin baş məşqçisi Roman Qriqorçukun azerisport.az saytına müsahibəsi
- "Xəzər Lənkəran"la oyundan nə gözləyirsiniz?
- Son mətbuat konfransında bu oyunla bağlı mənə sual verildi və söhbət zamanı belə başa düşdüm ki, rəqibimiz elə də güclü komanda kimi qəbul olunmur. Amma mən cənub klubunun çox maraqlı komanda olduğunu düşünürəm. Onlar kifayət qədər güclü futbolçulara malikdirlər. Heyətdə yer alan gənclər çox sürətlidirlər. Ona görə də biz bu oyuna ciddi yanaşmalıyıq.
- Cənublular xüsusilə öz meydanlarında, doğma azarkeşləri qarşısında daha aqressiv oyun sərgiləyirlər...
- Bunu futbolçularımıza da söyləmişəm. Doğrudan da bu komanda öz meydanında daha yaxşı çıxış edir. Xoşbəxtlikdən bu oyun öncəsi bizim də bərpa üçün kifayət qədər vaxtımız oldu.
- Qələbə seriyanızı davam etdirə bilərsiniz?
- Heç bir seriya barədə düşünmürəm. Qarşıda oyunlarımız var və yalnız onlarda necə yaxşı çıxış etmək haqda düşünürük.
- Azərbaycan çempionatında ardıcıl qələbə sayına görə rekorda imza atmaq şansı qazanmağınız sizi cəlb etmir?
- İdmanda qələbələr, rekordlar çox yaxşıdır. Amma mən bu seriyaya ciddi diqqət ayırmıram. Mənim üzərində düşünməli, çalışmalı olduğum məsələlər var. Məsələn, oyunumuzu daha da yaxşılaşdırmaq haqda düşünməliyik.
- "Qəbələ"nin son dövrlər hər kəs tərəfindən təriflənməsi komandanın daha da inkişaf etməsinə problem yaratmır?
- Futbolçulara bunu da demişəm. Onların beyni bütün bunlardan azad olmalıdır. Qələbə qazanırsansa, buna sevinməlisən. Amma buna çox vaxt ayırmaq düzgün deyil. Çünki qarşıda növbəti oyunlar da var və onları düşünmək lazımdır.
- Azərbaycanlı və ukraynalı futbolçularınızın psixolohiyasında çoxmu fərq var? Məsələn, yerli futbolçular tənqid və tərifə daha çox diqqət ayırırlar...
- Mən ilk gündən hiss etdim ki, bu məsələ ilə bağlı daha çox çalışmağa ehtiyac var. Yüksək nəticələr qazanmaq üçün buna məcburuq. İrəliləyişin olduğunu da qeyd etmək istərdim. Amma daha da çox çalışmalıyıq.
- "Qəbələ"yə yayda gəlsəydiniz, komanda indi çempionluğa oynaya bilərdi?
- Bu barədə heç düşünməmişəm. İndi soruşursunuz, nə deyəcəyimi bilmirəm (gülür). Necə olacağını demək çətindir. Amma hər şeyin düzgün edildiyini düşünürəm və bu üzdən də sizin sualınıza cavab verməkdə çətinlik çəkirəm.
