Əfran İsmayılov: İnterin ilk dəqiqələrdən hücuma atılacağını düşünmürəm

"İnter"in yarımmüdafiəçisi Əfran İsmayılovun azerisport.az saytına müsahibəsi

- "Neftçi" ilə kubokun cavab yarımfinal oyunundan nə gözləyirsiniz?
- Hesab edirəm ki, bizə çox çətin olacaq. "Neftçi" ilk oyunda böyük üstünlük qazandı. Bu üzdən də cavab görüşündə bizə ancaq hücum etmək lazımdır.

- Düşünmürsünüz ki, "Qəbələ"yə son məğlubiyyət rəqibinizə mənfi təsir etsin?
- Xeyr. "Neftçi" hazırda çempionatdan daha çox, kubokda uğur qazanmaq haqda düşünür.

- "İnter" ilk dəqiqələrdən hücuma atılacaq, ya rəqibin səhvini gözləyəcək?
- Hakimin start fiti səslənən kimi hücuma atılacağımızı düşünmürəm. Belə olan halda yana bilərik. Çünki "Neftçi"nin yaxşı sürətli futbolçuları var. Ağıllı və səbrli oynamalıyıq.

- "Neftçi"nin çempionatı düşünmədiyini dediniz. Məgər "İnter" "Qarabağ"ın çempionluğu ilə barışmayıb?
- Düzdür, "Qarabağ"dan geri qalırıq, aradakı xal fərqi böyükdür. Amma biz hələ də hər iki cəbhədə mübarizəmizi davam etdiririk.

- Mövsümün sonunda "İnter"də qalacaqsınız?
- İndi mən heç nə deyə bilmərəm. Çünki çempionat davam edir. Qarşıda çətin oyunlarımız var. Bütün fikrimiz bu oyunlara yönəlib. Yayda müqaviləmin müddəti başa çatacaq. Amma mən qərar verməyə tələsmək istəmirəm.

- Deyilənə görə, klubda maliyyə vəziyyətinə görə atmosfer elə də yaxşı deyil...
- Bu barədə bizə heç nə deyilməyib. Hər şey qaydasındadır, heç bir problem yoxdur. Bizə deyilib ki, yaxın günlərdə maaşlarımız da ödəniləcək.