Matiya Şpiçiç: İnterdə kimin qalacağına yeni baş məşqçi qərar verəcək

"İnter"in yarımmüdafiəçisi Matiya Şpiçiçin azerisport.az saytına müsahibəsi

- Komandanızın kubokdakı şanslarını necə qiymətləndirə bilərsiniz?
- "Neftçi" ilə ilk oyunun nəticəsi bizi sevindirə bilməz. Bu üzdən də sabah baş tutacaq cavab oyununda işimiz çox çətin olacaq. Amma biz əminik ki, bu cütdə intriqanı yenidən bərpa edə bilərik və şansımız hələ qalır. Buraxılan iki qolun əvəzini çıxa bilərik.

- Komandanız həm "Neftçi"yə uduzduğu həmin oyunda, həm də "Bakı" üzərində qələbə qazandığı çempionat görüşündə zəif təsir bağışladı. Problem nədədir?
- Nəsə demək çətindir. Ola bilər ki, baş sponsorla bağlı vəziyyət təsir edir. Psixoloji cəhətdən bu, təsir etməyə bilməz. Amma belə komandada atmosfer normaldır. Deməzdim ki, klubumuzda təşviş var. Hər kəs öz işi ilə məşğuldur. Pis oyunlar olur, amma nəticə daha vacibdir. Bu da bizdəvar. "İnter" hazırda çempionatda ikinci yerdədir, kubokun yarımfinalındadır.

- Maaşlarınızın gecikməsi barədə yayılan xəbərlər doğrudur?
- Sponsor dəyişikliyi komandaya təsir etməyə bilməzdi. Bu mənada bəzi problemlərimiz var. Tezliklə bizə vəd olunan məvacibi alacağıq. Burada ciddi heç nə yoxdur. Klubdan bizə deyiblər ki, maliyyə problemləri öz həllini tapacaq.

- Niyə əsas heyətdə daha çox görünmürsünüz?
- Normal məşq edirəm, amma niyə oynamadığımı bilmirəm. Ola bilsin ki, bu, legionerlərə qoyulan limitdən irəli gəlir. Belə məsələləri baş məşqçi həll edir. O, son oyunda mənə şans verdi və fikrimcə, yaxşı yararlandım. Yenə də şans gözləyirəm.

- Mövsümün sonunda karyeranızla bağlı hansı planınız var?
- "İnter"in 90 faiz futbolçusu ilə müqaviləsinin müddəti bitir. Bizə deyiblər ki, hər şeyə yeni baş məşqçi qərar verəcək. O, kimləri istəsə, onlarla da müqavilə yenilənəcək.

- Siz "İnter"də qalmaq istəyirsiniz?
- Hələ hər şeyin mənim üçün necə nəticələnəcəyini bilmirəm. Agentim deyib ki, karyeramı davam etdirmək üçün başqa variantlar da var.