Vüqar Nadirov: Beş minlik stadion daha tez dolacaq və bizə orada oynamaq xoş olacaq
"Qarabağ"ın hücumçusu Vüqar Nadirovun azerisport.az saytına müsahibəsi
- "Qarabağ" qarşıdakı bir həftə ərzində "Simurq"la iki oyun keçirəcək. Kubok və çempionat çərçivəsində baş tutacaq bu görüşlərdən nə gözləyirsiniz?
- Bu oyunlar ardıcıl baş tutacağından, Bakıya qayıtmağa ehtiyac yox idi. Ona görə də elə Zaqatalada qalmağa qərar verdik. Hər iki oyun komandamız üçün vacibdir. Ciddi hazırlaşırıq. Qələbə qazanmağımız lazımdır.
- 10 gün ərzində bir komandaya qarşı üç oyun keçirmək bezdirici deyil?
- Buna alışmamışıq. Amma klublarımızın sayı az olduğundan, belə hallar qaçılmaz olur.
- Sizdən fərqli, "Neftçi" "İnter"lə kubok oyununda daha inamlı qələbə qazanıb və güman ki, finala çıxsanız, bu komandaya qarşı oynamalı olacaqsınız...
- "Neftçi"nin artıq özünü finalçı hesab etdiyini düşünmürəm. Cavab oyununda istənilən nəticə qeydə alına bilər. Biz də ilk oyunda kiçik üstünlük əldə etmişik və bu, bizi qətiyyən arxayınlaşdıra bilməz. Həm də "Simurq"la cavab oyunundan öncə hələ Premyer Liqa çərçivəsində də görüşümüz var. Öncə 3 xalı qazanmaq barədə düşünməliyik.
- İki qələbə də qazansanız, "Qarabağ" çempion olacaq...
- Bu barədə düşünmək istəmirik. Qarşıda ciddi səfər oyunumuz var. Bizə hələ bu görüşdə uğur qazanmaq haqda düşünmək lazımdır.
- Dünyanın bir sıra stadionlarında, bazasında olmusunuz. Sizin üçün yeni tikilən baza və stadionu onlarla müqayisə edə bilərsiniz?
- Bizim üçün 5 ulduzlu şərait yaradılır. Tam hazır olmasa da, orada olmuşuq. Amma indidən necə gözəl olacağını görmək olur.
- Böyük ehtimalla "Qarabağ" növbəti mövsümdən ev oyunlarını məhz orada keçirəcək...
- Bu, bizim üçün çox rahat olacaq. Stadiondan stadiona qaçmağa ehtiyac qalmayacaq. Hər şey əlimizin altında olacaq. Azarkeş tutumu azdır. Amma Tofiq Bəhramov adına Respublika stadionundakı kimi yarıboş tribunalar önündə oynamaqdansa, dolu arenada çıxış etmək daha yaxşıdır. 5 minlik stadion daha tez dolacaq və bizim üçün orada oynamaq çox xoş olacaq.
