Benjamin Lambot: Bizim finala çıxmaq üçün gözəl şansımız var
"Simurq"un yarımmüdafiəçisi Benjamin Lambotun azerisport.az saytına müsahibəsi
- "Simurq"u qarşıda "Qarabağ"la daha iki oyun gözləyir. Kubokdakı ilk oyun isə sizin məğlubiyyətinizlə başa çatdı. Səbəb nə oldu?
- Bizim sadəcə, bəxtimiz gətirmədi. Biz topa daha çox nəzarət edirdik, daha çox hücum edirdik. Nəticə oyuna görə olmadı. Demirəm ki, biz onlara qalib gəlməli idik. Heç-heçə daha ədalətli nəticə ola bilərdi. Çox təəssüf ki, uduzduq.
- Bu oyunda qol epizodlarını boşa verməklə yadda qaldınız...
- Dediyim kimi, həmin gün fortuna bizim tərəfimizdə deyildi. Stanoyeviç iki dəfə cərimə zərbəsi yerinə yetirdi, hər ikisini qapıçı qaytardı. Çeranın zərbəsindən sonra top qapı dirəyindən döndü. Bütün bu epizodları qola çevirə bilsəydik, oyun tam fərqli nəticələnəcəkdi.
- "Qarabağ"ın süni ot örtüyündə çətinliklə üzləşəcəyini bilirdiniz?
- Bu barədə düşünməmişdim. Düşünmürəm ki, burada meydan amilinin hansısa rolu olsun.
- "Qarabağ"la ardıcıl daha iki oyun var. Onlardan biri kubok, digəri çempionat oyunudur. Hansı daha vacibdir?
- Fərqi yoxdur. Bizim ölkə kubokunun finalına çıxmaq üçün çox yaxşı şansımız var. Amma eyni zamanda çempionatı da unutmamalıyıq. Zaqatalada baş tutacaq hər iki oyunu yüksək səviyyədə keçirməliyik.
- Bir komandaya qarşı ardıcıl üç oyun keçirmək bezdirici olmur?
- Müəyyən mənada əlbəttə, xoşagələn deyil. Təsəvvür edin ki, bu mövsüm "Qəbələ"yə qarşı altı oyun keçirmişik, indi də "Qarabağ"la eyni sayda qarşılaşma keçirməliyik. İki komandaya qarşı 12 oyun!
- "Qarabağ"da da buna sevinmirlər...
- Bir halda ki, sevinmirlər, deməli, ehtiyat edirlər. Biz də onlara hörmətlə yanaşırıq.
