Mirhüseyn Seyidov: Qəbələnin ardıcıl altı qələbəsi bizi qorxutmur
"Neftçi"nin yarımmüdafiəçisi Mirhüseyn Seyidovun azerisport.az saytına müsahibəsi
- "İnter" üzərində qazandığınız qələbə ilə bağlı nə deyə bilərsiniz?
- Öz meydanımızda oynasaq da, asan olmayacağını bilirdik. Hər şeyə rəğmən, qələbə qazana bildik. Amma hələ heç nə bəlli deyil. Cavab oyununda da belə oynasaq, finala çıxa bilərik.
- Matçın əvvəlində rəqib futbolçu Elvin Məmmədov cərimə meydançanızda yerdə qalarkən kənardan penalti olduğu təəssüratı yaranırdı. Bəs siz necə düşünürsünüz?
- Oyun epizodu idi. Mən dəqiq nəsə deyə bilmərəm. Hakim öz qərarını verdi. Hətta orda penalti olsaydı da, qərarı biz qəbul etmirdik.
- Yəqin ki, oxşar epizod rəqib qapısı qarşısında yaransaydı, indi siz fərqli danışardınız...
- Yəqin ki. Hər kəs öz komandası üçün çalışır.
- Komandanız paytaxt derbisində çox istəkli görünürdü. Bu, kluba yeni rəhbərliyin gəlməsi ilə əlaqədar idi?
- Bununla bağlamazdım. Gözəl başa düşürük ki, mövsümün sonuna çox az qalıb. Buna görə də maksimum gücümüzü qoymağa çalışırıq ki, uğur qazanq. Çünki biz hələ Avropa Liqasına da vəsiqəni təmin etməmişik. Bu baxımdan ən yaxın yol ölkə kubokudur. Həm də ən azından bir titul qazanmaq istəyirik.
- Finala çıxsanız, "Qarabağ"la qarşılaşıb, revanş almaq istərdiniz?
- Hələ öncə finala çıxaq, sonra revanş barədə danışarıq. İndidən bu barədə danışmaq üçün tezdir.
- "İnter"lə oyundan sonra Çingiz Abdullayev sizə nə dedi?
- Həmişəki kimi, komandanı təbrik etdi. Daha yaxşı oynamağa başladığımızı qeyd etdi. Oyunumuz xoşuna gəlmişdi. Rəhbərliyə bu diqqətə görə təşəkkürümüzü bildiririk.
- Qarşıda "Qəbələ" ilə oyun var...
- Üçüncü pillədə qərarlaşmağımız baxımından bu oyun bizim üçün çox vacibdir. Qələbə qazanmağımız lazımdır. Buna nail olsaq, rəqibimizdən 3 xal aralanmış olacağıq.
- "Qəbələ"nin son altı oyunda ardıcıl qələbəyə sevinməsi sizi qorxutmur?
- Xeyr, qorxutmur. Öz meydanımızda oynayacağıq. Burada bizim oyunumuz daha yaxşı alınır. Rəqibin kimliyindən asılı olmayaraq, qələbə qazanmaq istəyirik.
