Qara Qarayev: Simurqla səfər oyunu daha çətin olacaq
"Qarabağ"ın yarımmüdafiəçisi Qara Qarayevin azerisport.az saytına müsahibəsi
- "Simurq"la kubokun ilk yarımfinal oyununda qazandığınız qələbəni necə şərh edərdiniz?
- Çətin oyun alındı. "Simurq" bizim üçün çətin rəqiblərdəndir. Amma buna baxmayaraq qələbə qazana bildik. Cavab oyunu öncəsi üstünlük əldə etməyimiz sevindiricidir.
- Siz bu oyunda bir qədər aqressiv təsir bağışlayırdınız...
- Mənə məhz belə tapşırıq verilmişdi. Mümkün qədər aqressiv oynamağa çalışırdım. Şübhəsiz ki, hakimin sarı vərəqəsinə tuş gəlməmək şərti ilə.
- Etiraf etmək lazımdır ki, "Qarabağ"ın bu oyunda bəxti gətirdi...
- Mənim fikrimcə, onların elə də çox qol epizodu olmadı. Sadəcə, bir dəfə Draqan Çeranın zərbəsi dirəkdən döndü. Baxmayaraq ki, rəqibin heyətində heç nədən qol vəziyyəti yaratmağı bacaran futbolçular var. Hamı başa düşürdü ki, kim birinci qol vursaydı, oyunu da o aparacaqdı. Bu da bizə nəsib oldu.
- 1:0 ümumi qələbə üçün yetərli olacaq?
- Zaqatalada baş tutacaq cavab oyunu çox çətin olacaq. Ümumiyyətlə, orada oynamaq hər bir komandaya çətindir.
- "Simurq"un futbolçuları ucaboydurlar. Bu, sizə problem yaratmır?
- Bəli, yaradır. Amma biz mümkün qədər yaxşı mübarizə aparmağa çalışırıq.
- İkinci hissədə Qurban Qurbanov sizi Hacı Əhmədovla əvəzlədi...
- Bu, baş məşqçinin qərarıdır. Mənim üçün problem yoxdur. Kiçik zədəm var idi. Ola bilər ki, Qurbanov məni ona görə əvəzlədi.
- Bəzi aparıcı oyunçuların meydanda olmaması komandaya nə dərəcədə təsir etdi?
- Əlbəttə, bunun təsiri olur. Amma meydana çıxanlar da öz işlərinin öhdəsindən gəldilər. Əgər səfər oyununda hamı oynasa, daha yaxşı çıxış edəcəyik. Belədə, qol vəziyyətlərimizin də sayı çox olacaq.
