Tuyqun Nadirov: Topazın PFL-lə əməkdaşlığı bizə maraqlı deyil
AFFA Klublar Komitəsinin bu gün növbəti iclası keçirilib. İclasdan sonra komitəyə sədrlik edən "Xəzər Lənkəran"ın vitse-prezidenti Tuyqun Nadirov fikirlərini bölüşüb:
"Çoxlu məsələ müzakirə olundu. AFFA prezidenti Rövnəq Abdullayev oyunların teleyayımı ilə bağlı bizim fikirlərimizi dəstəkləyir".
Legioner haqqı: "Legionerlərə görə ödənilən məbləğlərlə bağlı müzakirələr aparıldı. Əgər legioner futbolçu ölkəsinin yığmasına dəvət olunmursa və Premyer Liqamızda oynayırsa, ilk mövsümündə ona görə 20 000 manat ödənilməlidir. Üç legionerin iştirak ərizəsinə pulsuz daxil edilməsini istəyirik. 21 və 23 yaş arası legionerlərə görə isə ümumiyyətlə ödəniş nəzərdə tutulmamalıdır. Yaşla bağlı bir qədər də dəqiqləşdirmə aparacağıq".
"InStat Football" barədə: "InStat Football" şirkətinin rəsmisi ilə görüşdük. Bundan əvvəl hər klub bu şirkətlə fərdi qaydada çalışırdı. Bundan sonra isə bütün klublar birgə çalışacaqlar. Amma müəyyən güzəştlərlə. Onlarla iki illik əməkdaşlıq etmək barədə razılıq əldə etdik".
"Topaz" barədə: "Topaz" klublarla əməkdaşlıq etməyə hazırdır. Bizi onların PFL ilə əməkdaşlığı maraqlandırmır. Əgər bu qurum bizim titul sponsorumuzdursa, bizimlə işləməlidir".
Karlos Kardosonun diskvalifikasiyası barədə: "Hər bir klub belə aqibətlə üzləşə bilər. "Neftçi" etiraf edir ki, onlar İK-nın qərarına müdaxilə etməyiblər. AZAL da öz növbəsində deyir ki, Rəşad Abdullayevə 3 oyunluq cəza veriləndə, onlar üçün heç bir güzəştə gedilmədi. Biz bu məsələ ilə bağlı İK-ya müraciət edəcəyik. Qaydalar var, ona da uyğun hərəkət edilməlidir".
Bundan sonrakı görüşlərin yeri barədə: "Qərara gəldik ki, bundan sonra Klublar Komitəsinin üzvləri klubların bazasında görüşsün. İlk görüş yerimiz "Qarabağ"ın bazası olacaq".
