Kamran Quliyev: Ceyhun Sultanov qalır, futbolçular isə ciddi şəkildə cərimələnəcək

"Sumqayıt"ın prezidenti Kamran Quliyev ötən gün baş tutan klubdaxili iclasdan və orada qəbul olunan qərarlardan danışıb. Azerisport.az saytına açıqlamasında o, bunları söyləyib:

"Bu toplantıda futbolçular işlərinə qeyri-qənaətbəxş münasibətə görə pul cərimələndilər. Komanda üçün hər cür şərait yaradılsa da, uzun müddətdir qələbə qazana bilmirik. Cərimənin məbləğini açıqlamayacağam. Amma onların maaşından xeyli kəsiləcək. Biz bunu özbaşınalıq kimi qiymətləndiririk. Hətta deyərdim ki, bu cərimələri tətbiq etməkdə gecikmişik".

Klub prezidenti Ceyhun Sultanovun istefa verdiyi barədə xəbərlərə də münasibət bildirib: "Ceyhunun istefasını qəbul etməmişik. Mənə elə gəlir ki, indiki çətin vəziyyətimizin günahını hər kəsdə axtarmaq lazımdır. Bütün günahı baş menecerin üzərinə atmaq düzgün deyil. Onun əsas işi baş məşqçiyə potensial yeni futbolçuların siyahısını təqdim etməkdir. Onun vəzifələri sırasına həmçinin toplanışların, maaşların, mükafatların vaxtında təşkil olunması, futbolçuların problemlərinin vaxtında həll olunması da daxildir. Sultanov bütün bu vəzifələrin öhdəsindən gəlir. Biz onun istefasını qəbul etməyə səbəb görmürük".