Nazim Süleymanov: Millinin inkişafı üçün əlimdən gələni edəcəyəm
Azərbaycanın U-19 yığma komandasının baş məşqçisi təyin olunan Nazim Süleymanovun azerisport.az saytına müsahibəsi
- U-19-a baş məşqçi təyin olunmağınız sizin üçün nə dərəcədə gözlənilməz oldu?
- Mətbuatda namizədlərdən biri olduğumu oxumuşdum. Amma yekun qərar açıqlananda təbii ki, çox sevindim.
- Köməkçilərinizi müəyyənləşdirmisiniz?
- Təklif yeni gəlib. Mənə hələ düşünmək lazımdır.
- "Xəzər Lənkəran" və "Neftçi"də birgə çalışdığınız mütəxəssislərdən hansınısa çağırmaq barədə düşünmürsünüz?
- Hələlik, ad çəkmək istəmirəm.
- Təyinatdan sonra AFFA rəhbərliyi ilə söhbətiniz olub?
- Bəli, Elxan Məmmədovla görüşmüşəm. Ona bu etimada görə təşəkkürümü bildirdim. Həmçinin məni namizədlər siyahısına daxil edən Məşqçilər Komitəsinin üzvlərinə də minnətdaram.
- Amma əksəriyyət sizin Məşqçilər Komitəsində yer alacağınızı gözləyirdi...
- Nə deyə bilərəm? Məşqçilər həmişə təklif gözləyirlər. Məşqçilər Komitəsinin üzvləri layiqli insanlardır. Mən baş məşqçi kimi çalışmaq istəyirdim. Bu istəyimə uyğun da təklif aldım. Bu komandanı qaldırmaq üçün əlimdən gələni edəcəyəm.
