Kaue: Hakimin niyə penalti təyin etmədiyini ondan soruşun
"Neftçi"nin yarımmüdafiəçisi Kauenin azerisport.az saytına müsahibəsi
- Kubokun ilk oyunları çərçivəsində "İnter" üzərindəki ilk qələbənizlə bağlı nə deyə bilərsiniz?
- Yaxşı oynadıq. "Neftçi" səviyyəsində oyun sərgilədik. Vacib qələbə qazandıq. Artıq finalın bir addımlığındayıq. Evdə qol buraxmadan qələbə qazanmağa borclu idik. Biz də buna nail olduq.
- Demək olar ki, siz artıq finaldasınız. Çünki iki cavabsız qolun əvəzini çıxmaq çox çətin olur...
- Mən hələ də bu nəticənin təhlükəli olduğunu düşünürəm. Cavab oyununu gözləməliyik. Lənkəranda da biz 2 cavabsız qolla öndə idik. Amma sonda heç-heçə ilə barışmalı olduq. Halbuki, rəqib də azlıqda idi.
- Oyunun əvvəlində Elvin Məmmədova qarşı cərimə meydanındakı kobudluq penalti idi?
- Sual düzgün ünvanlanmayıb. Bunu hakimdən soruşsanız, daha yaxşı olar. Əgər hakim penalti təyin etməyibsə, deməli, yox idi.
- "Qarabağ" da "Simurq"a minimal hesabla qalib gəldi. Finalda bu komanda ilə qarşılaşmaq istərdiniz?
- Biz hələ finala çıxmamışıq ki, həlledici oyunakı rəqibimizi seçək. Əgər finala çıxsaq, kiminlə oynamağımızın fərqi yoxdur. Fikrimcə, bizim qalib gələ bilməyəcəyimiz komanda yoxdur.
- Qarşıda sizi "Qəbələ" ilə vacib oyun gözləyir. Bərpa üçün dörd gün bəs edəcək?
- Aprel ayı bu baxımdan bizim üçün çox vacibdir. Bütün oyunlara hazır olmalıyıq. İkinci hissədə meydana çıxan futbolçularımızın uğurlu çıxış etməsi sevindirməyə bilməz. Deməli, ehtiyat qüvvəmiz var. Fikrimcə, "Qəbələ"yə qarşı da uğurlu çıxış edə biləcəyik.
- Mövsümün sonunda komandanı tərk edəcəyiniz doğrudur?
- (gülür). Elə şey yoxdur. Mənim "Neftçi" ilə müqaviləm var.
