Çingiz Abdullayev: Vəli Qasımovla Dmitri Kramarenko Neftçidə çalışacaq

Bu gün "Neftçi"nin Müşahidə Şurasının ilk iclası təşkil olunub. Azerisport.az xəbər verir ki, "Bakcell Arena"da baş tutan iclasdan sonra media nümayəndələri üçün brifinq keçirilib.

Müşahidə Şurasının sədri Çingiz Abdullayev fikirlərini bölüşüb: "Klubdakı strukturu dəyişməyə mövsüm başa çatdıqdan sonra start verəcəyik. Artıq iki yeni mütəxəssisi işə dəvət etmişik. Dmitri Kramarenko bundan sonra qapıçılarımızla çalışacaq. Vəli Qasımov isə idman direktoru təyin olunacaq. Onlar mənim dostum və ya qohumum deyillər. Sadəcə, peşəkar insanlardır. Vəli ispan və portuqal dillərini də bilir. Fikrimcə, onun bizə xeyri dəyəcək. Hələ "Neftçi"ni kimlərin tərk edəcəyini isə indidən deyə bilmərəm. Hər şeyə mövsümün sonunda qərar verəcəyik. İndi oyunlarımız davam edir və bu barədə nəsə deməyimiz düzgün olmaz".

Abdullayevin sözlərinə görə, komandasının kuboku qazanmasını çox istəyir: "Mən buna inanıram. Məni komandanın kuboka sahib çıxması və avrokuboklara çıxması qane edəcək. "Neftçi" bir əfsanədir və komanda bu ada uyğun futbol sərgiləməlidir. Bu markanı qoruyub saxlamağımız lazımdır".

MŞ sədri klubun bazasının vəziyyətinə də toxunub: "Baza bizi qane etmir. Düzdür, böhran var, amma bizim yaxşı bazamız olmalıdır. "Xəzər Lənkəran"ın bazasını tərifləmək istərdim. Ora mənim çox xoşuma gəldi. "Neftçi"nin də yaxşı şəraiti olmalıdır. Avropa səviyyəli klub formalaşdırmaq istəyirik. Bunun üçün də yola çıxmalıyıq. Avropada öz sözünü deyə biləcək klubumuz olmalıdır".

Abdullayev klubun muzeyinin yaradılması ideyasından da danışıb: "Biz bu məsələni də müzakirə etmişik. Muzey "Bakcell Arena"da yaradılacaq".