Azərbaycan Kubokunda 1/2 final həyacanı
Bu gün Azərbaycan kubokunda yarımfinal mərhələsinin ilk oyunları keçiriləcək. Azerisport.az xəbər verir ki, mübarizəni davam etdirən 4 komanda 2 cütdə münasibətlərini aydınlaşdıracaq.
Bu cütlərdən biri indiyədək kubokda üz-üzə gəlməyibsə, digərinin yolları 7-ci dəfə kəsişir. Belə ki, “Neftçi” ilə “İnter” bundan öncə kubok çərçivəsində 12 oyun keçirib. Bunlardan 6-sı heç-heçə bitibsə, 2-də "ağ-qaralar", 4-də "bankirlər" qələbə qazanıblar. "İnter" top fərqində də öndədir - 11:8. İndiyədək 3 dəfə yarımfinal, 3 dəfə 1/4 finalda qarşılaşan paytaxt təmsilçiləri hərəsi 3 dəfə mərhələ adlayıb. “Neftçi” son 2 dueldəki 4 matçda uduzmadan mərhələ keçib. Premyer Liqanın turnir cədvəlində qonşu olan, çempionluq şansları demək olar ki, qalmayan paytaxt təmsilçilərinin kubokda mübarizəni davam etdirməsi üçün əllərindən gələni əsirgəməyəcəyi şübhə doğurmur.
Digər yarımfinal görüşündə “Qarabağ” “Simurq”la qarşılaşacaq. Bu komandalar indiyədək kubok çərçivəsində görüşməyiblər. Kubok matçını "Simurq" üçün daha vacib saymaq olar. Çünki bu komandanın Premyer Liqadan Avropa Liqasına vəsiqəni təmin etməsi çətin görünür. Amma kuboku qazanmaqla avrokuboklarda çıxış etmək hüququ qazanmaq daha asan yol hesab oluna bilər. Bunun üçün Georgi Çixradzenin komandasının finala çıxmaq üçün "Qarabağ"a qarşı sonadək mübarizə aparacağı gün kimi aydındır. Lakin Ağdam klubu da kuboku çempionata qurban verməyə hazırlaşmır. Qurban Qurbanovun komandası Premyer Liqada da növbəti çempionluğa yaxın olduğundan ötən il nail ola bilmədiyi qızıl dubla çalışacaq. Çempionatın liderinin buna nə dərəcədə nail olacağını isə zaman göstərəcək.
Azərbaycan Kuboku
Yarımfinal (ilk oyunlar)
13 aprel (bazar ertəsi)
18:00. “Qarabağ” – “Simurq”
Bakı. “İnter Arena”.
19:00. “Neftçi” – “İnter”
Bakı. “Bakcell Arena”.
