İlqar Qurbanov: Ötənilki xal itkiləri bizim üçün dərs olmalıdır

"Qarabağ"ın yarımmüdafiəçisi İlqar Qurbanovun azerisport.az saytına müsahibəsi

- AZAL üzərində qazandığınız əzmkar qələbə ilə bağlı nə deyə bilərsiniz?
- Bizim üçün heç oyun asan keçmir. Bütün komandalar sonadək mübarizə aparırlar. AZAL-ın da yaxşı kollektivi var. Qalib gəldiyimizə görə şadıq. Hesab edirəm ki, biz bu oyunda əsl xarakter göstərdik.

- İkinci hissədə siz Rəşad Sadıqovu əvəzlədiniz...
- Hə, onun ağrıları var idi. Amma dəqiq nə baş verdiyini bilmədim. Sadəcə, mənə hazırlaşmağımı dedilər və meydana çıxdım.

- "Qarabağ"ın çempionluğu təmin etdiyini demək olar?
- Bizim çempionatda hər şey mümkündür. Ona görə də hər bir oyuna ciddi yanaşmaq lazımdır. Arxayınlaşmaq olmaz. Bizim əsas rəqiblərimizlə oyunlar hələ qarşıdadır. Kubok oyunları da var. Ötən il üzləşdiyimiz aqibət bizə dərs olmalıdır. Rəqiblərimizlə arada çox böyük fərq olsa da, ardıcıl xallar itirmişdik. Bu mövsüm həmin səhvləri təkrarlamamalıyıq.

- "Simurq"la ilk yarımfinal oyunundan nə gözləyirsiniz?
- "Simurq" həmişə bizim üçün çətin rəqib olub. Amma ümid edirəm ki, müsbət nəticə qazana biləcəyik.

- "Qarabağ" son dövrlər Tofiq Bəhramov adına respublika stadionunu "Bakcell Arena"ya dəyişmişdi. "Simurq"u isə "İnter Arena"da qəbul edəcəksiniz. Bu, sizin üçün nə dərəcədə rahatdır?
- Əlbəttə, yenə mərkəzi arenada oynamağımızı istərdik. Amma hansı stadionda oynamağımızdan asılı olmayaraq, biz hər matçda öz oyunumuzu sərgiləməyə borcluyuq.

- Komandanız qızıl dubl etməyə qadirdir?
- Yaşayarıq, görərik.

- Klubla müqavilənizin müddəti nə vaxt başa çatacaq?
- May ayında. Hələ ki, yeni müqavilə ilə bağlı danışığımız olmayıb.