Ruslan Fomin: 6 xallıq fərq az deyil

"Qəbələ"nin hücumçusu Ruslan Fominin azerisport.az saytına müsahibəsi

- "Simurq" üzərində qələbə ilə bağlı nə deyə bilərsiniz?
- Yaxşı oyun alındı. "Simurq" layiqli rəqibdir. Balanslaşmış və güclü komandadır. Bizim bu komanda ilə əvvəlki oyunlarımız uğursuz alınmışdı. Şadam ki, uğursuz gedişata son qoyduq və bu dəfə biz qalib gəldik. Çox vacib qələbə qazandıq: həm turnir cədvəli baxımından, həm də psixoloji baxımdan.

- Altı ardıcıl qələbə təsadüfdür, qanunauyğunluqdur, ya Roman Qriqorçukun fenomenidir?
- Hələ fenomenlikdən danışmaq üçün tezdir. Çünki biz hələ heç nə qazanmamışıq, heç nəyə nail olmamışıq. Sadəcə, turnir cədvəlində iki pillə irəliləmişik. Mövsümün sonunda yenidən bu sualınıza qayıdarıq. Qarşıda bizi "Neftçi" ilə vacib oyun gözləyir.

- Qarşıda daha altı oyun var. Mövsümün sonunadək 12 qələbəlik seriya əldə edə biləcəksiniz?
- (gülür) Hər şey mümkündür, amma siz hadisələri qabaqlamağa tələsməyin. Əlbəttə, belə bir uğurlu seriyaya nail olmaq psixoloji baxımdan çox önəmlidir. Biz də bu seriyanı davam etdirməyi çox istəyirik.

- "Neftçi" ilə son ev oyununda məğlub olmusunuz...
- "Neftçi" də yaxşı komandadır. Onların üçüncü yerdə qərarlaşması da təsadüfi deyil. Biz həmin oyunda hesabda öndə olduğumuz halda uduzmuşduq. Amma ilk yarıda dəyərləndirmədiyimiz 2 yüzfaizli vəziyyəti qola çevirsəydik, çətin ki, məğlub olardıq.

- Bu oyunu bakılılarla aranızdakı xal fərqini azaltmaq üçün bir şans saymaq olar?
- Altı xallıq fərq az deyil. Ağır olacaq. Həm də biz səfərdə oynayacağıq. Yəqin ki, onlar da bu görüşün əhəmiyyətini başa düşürlər və qələbəyə köklənəcəklər.

- Siz hələ ki, qol vurmaq baxımından problem yaşayırsınız. Hələ də yerli futbola uyğunlaşa bilməmisiniz?
- Əvvəllər mənə çətin idi. Xüsusilə də ilk 5-6 oyunda. İndi özümü daha yaxşı hiss edirəm. Baş məşqçi məni yaxşı tanıyır. Son oyunlarda mən də onun istədiyi kimi çıxış etməyə çalışıram. Bəzən nəsə alınır, nəsə yox. Fikrimcə, gec-tez qollar da gələcək.