Aqil Məmmədov: Fasilədə bizə arxayınlaşmamaq tapşırılsa da, bu, baş verdi

"Neftçi"nin qapıçısı Aqil Məmmədovun azerisport.az saytına müsahibəsi

- "Xəzər Lənkəran"la heç-heçə ilə bağlı nə deyə bilərsiniz?
- Bizim qol vurmaq üçün çox yaxşı qol vəziyyətlərimiz oldu. Birinci hissədə onların ikisindən yararlana bildik. Amma ikinci hissədə nədənsə arxayınlaşdıq. Öz oyunumuzu tapa bilmədik. Rəqib isə əksinə, azlıqda qalmasına baxmayaraq, hesabı bərabərləşdirdi. Məncə, bu heç-heçə onlar üçün qələbəyə bərabərdir.

- Bəs sizin üçün?
- Aydın məsələdir ki, bizim üçün məğlubiyyətə bərabər heç-heçə oldu. İki xal itirdik.

- Komanda ikinci hissədə niyə arxayınlaşdı?
- Fasilədə komandaya arxayınlaşmamaq tapşırığı verilsə də, bu, baş verdi. Bu heç-heçə bizə çox pis təsir etdi.

- Amma qapınıza çox az zərbə endirildi. Bütövlükdə, 3 və ya 4 zərvə oldu, onların da ikisi qola çevrildi...
- Ona görə deyirlər ki, qapıya nə qədər çox zərbə gəlsə, qapıçı özünü bir o qədər inamlı hiss edir.

- İlk qol zamanı nə baş verdi? Rahid Əmirquliyevin zərbəsi o dərəcədə qarşısıalınmaz idi?
- Bəli, top trayektoriyasını dəyişdi. Həm də mən topu Rahid vurandan sonra gördüm. Görüntü bağlı idi.

- Matç "Böyük oyun" adına layiq oldu?
- Deməzdim. Amma istənilən halda həm bu, həm də digər komanda fərqləndi. Mübarizə var idi.

- İkinci hissədə sanki "Neftçi" həvəssiz oynayırdı. Niyə?
- "Xəzər Lənkəran" göstərdi ki, futbol oyunu 90 dəqiqə oynanılır. Sonadək mübarizə aparmaq lazımdır. Bu xal itkisinin əsas səbəbi məhz arxayınlaşmağımız oldu.

- Siz çox hirsli görünürdünüz...
- Qələbə qazanmalı idik. Danışmağı hamı bacarır. Heç nədən iki qol buraxanda əsəb öz sözünü deyir.