Ruslan Abışov: Qəbələ 3-cü yer uğrunda da mübarizə apara bilər
"Qəbələ"nin müdafiəçisi Ruslan Abışovun azerisport.az saytına müsahibəsi
- "Simurq" üzərində qazandığınız qələbə barədə nə deyə bilərsiniz?
- Bu oyun bizim üçün finala bərabər idi. Çünki "Simurq" bizim Avropa Liqasına vəsiqə uğrunda əsas rəqiblərimizdən biridir. Əvvəlki oyunlarla müqayisədə biz bu dəfə elə də parlaq futbol sərgiləmədik. Digər tərəfdən bizim üçün bu oyunda əsas baxımlı futbol yox, nəticə idi. Buna da nail olduq.
- Revanş hissi var idi?
- Bəli. Çünki "Simurq" bizə həm kubokda, həm də Premyer Liqada acı məğlubiyyətlər yaşatmışdı. Şadam ki, bu dəfə biz qalib gəldik. Artıq bu oyunu unudub, qarşıdakı görüşlərə hazırlaşmalıyıq. Qarşıda bizi "Neftçi" ilə daha bir vacib qarşılaşma gözləyir.
- Altı ardıcıl qələbə nəyin göstəricisidir?
- Qış fasiləsi zamanı komandamızda xeyli dəyişikliklər oldu. Şübhəsiz ki, bu üzdən bizim zamana ehtiyacımız var idi. Fikrimcə, artıq bizdən gözlənilən oyunu göstərməyə başlamışıq. Amma bu, bacardığımızın hamısı deyil. Daha yaxşı oynaya bilərik. "Qəbələ" daha sürətli oynamağa çalışacaq.
- Bu oyunda cərimə zərbəsini yerinə yetirərkən çətin ki, onun belə qolla nəticələnəcəyini düşünürdünüz...
- Mən qapıya zərbə endirməyi yox, asma etməyi düşünürdüm. Belə ötürmələr təhlükəli olur və rəqib futbolçuları çaşdırır. Həmişə belə qollar vurmağı arzulayırdım.
- Bu qolu kimə həsr etdiniz?
- Şübhəsiz ki, bizim azarkeşlərə. Onlar bu oyunda bizi yaxşı dəstəklədilər. Biz artıq onları tribunalara qaytarmağı bacarmışıq. Növbəti oyunlarda da dolu tribunalar görəcəyimizə ümid edirik.
- "Qəbələ" dördüncü yeri tutsa da, yenə Avropa Liqasından kənarda qala bilər. "Simurq" kuboku qazansa, sizin bu pillədə qərarlaşmağınız da mənasız olacaq...
- Əlbəttə, buna görə bizi "Qarabağ"ın finala çıxması qane edir. Amma biz yenə də öz oyunumuzu düşünməyə çalışacağıq. Əgər qələbə qazanmağa davam etsək, niyə üçüncü yer uğrunda da mübarizə aparmayaq? Qarşıda "Neftçi" ilə oyun var. Bu görüş "Simurq"la görüşdən az əhəmiyyət daşımır.
- Səsiniz tutulub. Qola sevinərkən oldu?
- (gülür) Xeyr. Sadəcə, xəstələnmişəm. Bu, artıq ikinci oyun idi ki, meydana xəstə halda çıxmışdım.
