Çingiz Abdullayev: Daha 5-6 dəqiqə olsaydı, Neftçi qalib gələrdi

"Neftçi"nin Müşahidə Şurasının sədri Çingiz Abdullayevin azerisport.az saytına müsahibəsi

- "Xəzər Lənkəran"la oyun haqda nə deyə bilərsiniz? Komandanız 2 cavabsız qolla öndə olduğu halda, azlıqda qalan rəqibinə qalib gələ bilmədi...
- Bütövlükdə, çox yaxşı oyun alındı. Futbol belədir. Həm "Neftçi", həm də "Xəzər Lənkəran" yaxşı oynadı. Hansınınsa digərindən zəif oynadığını deməzdim. Sadəcə, bir məqamı qeyd etmək istərdim ki, bizim gəlişimzdən sonra "Neftçi" hələ uduzmayıb.

- Amma uduza da bilərdi...
- Uduzacağımıza inanmırdım. Özünüz də gördünüz ki, matçın sonlarında hücum edən məhz biz idik. "Xəzər Lənkəran"lı futbolçuların yorulduğu göz qabağında idi. Fikrimcə, daha 5-6 dəqiqə olsaydı, qələbə qazanardıq.

- Sizcə, fasilədə komandaya nə oldu ki, qələbəni əldən verdi?
- Fikrimcə, komandada bir qədər arxayınlıq yarandı. Biz də onlara sakit oynamağı tapşırmışdıq. Görünür, bunun da təsiri oldu. Həm də "Xəzər Lənkəran"ın ciddi hücumlar qurduğunu demək olmazdı. Onlar sadəcə, standart vəziyyətlərdən yaxşı yararlandılar. İnanıram ki, "Neftçi" qarşıdakı oyunlarda daha yaxşı çıxış edəcək.

- Deyilənə görə, Arif Əsədov istefaya göndəriləcək və onu almaniyalı mütəxəssislə əvəzləyəcəksiniz. Bu barədə yayılan xəbərlər nə dərəcədə doğrudur?
- Belə bir söhbət yoxdur. Mən elə bir şey eşitməmişəm. Arif Əsədov yaxşı məşqçidir. Əgər kimsə mənim adımdan elə bir söz yazıbsa, düz deyil. Kluba gəldiyimiz cəmi 10 gündür. Hələ hər şeyi tam dəqiqliyi ilə öyrənməliyik, ondan sonra nəsə düşünmək olar.

- Sizcə, "Neftçi" belə oyunla kubokda uğur qazana biləcək?
- Bir oyuna görə heç nə demək olmaz. "Xəzər Lənkəran"la heç-heçə nədir ki? Axı bu futboldur. Bəli, bizə nəticə lazımdır. Biz bu oyunda çox hücum etdik, son dəqiqələrdə hətta qapıçımız da kömək üçün irəli gedirdi. Amma alınmadı. Eybi yox, olan işdir.