Melvin Platye: Neftçini Venlo ilə müqayisə etmək istəməzdim
"Neftçi"nin hücumçusu Melvin Platyenin azerisport.az saytına müsahibəsi
- Hollandiyanın "Venlo" klubundakı işləriniz necə gedir?
- Super. Klubun liderlərindən biriyəm. Baş məşqçidən özümə qarşı böyük dəstək görürəm. Odur ki, hər şey əladır. Əlbəttə, heç kim öz gələcəyini sığortalaya bilməz. Amma ümid edirəm ki, bundan sonra da məndən razı qalacaqlar.
- "Neftçi"ni xatırlayırsınız?
- Əlbəttə. "Neftçi" güclü komandadır. Onu necə unutmaq olar? Klubun o qədər güclü legionerləri var.
- Kimi nəzərdə tutursunuz?
- Karlos Kardoso çox güclü müdafiəçidir. Lazım olanda sərt oynamağı da bacarır. Pavel Doroşevi qyed etmək lazımdır. Onunla dost münasibətimiz var idi. Eləcə də Ernest Nforla.
- Onlarla əlaqəniz qalıb?
- Vaxt olan kimi əlaqə qururuq.
- "Neftçi"nin işlərinin elə də yaxşı getmədiyindən xəbəriniz var?
- Bu barədə danışmaq istəməzdim. Düzgün çıxmaz.
- Məsələ burasındadır ki, komandanın bu mövsüm çempion olması, "Qarabağ"a çatması real görünmür...
- "Qarabağ" Azərbaycanın ən güclü klublarından biridir. Onların liderliyi də bunu sübut edir. Amma "Neftçi"nin zəif klub olduğunu deməzdim. Hər ikisi güclü komandadır.
- Hollandiyada uğurlu çıxış etsəniz də, Azərbaycanda oyununuz alınmadı...
- Azərbaycanı sevirdim, futbolunuz da xoşuma gəlirdi. Amma Hollandiyada işlərim daha yaxşı gedir. Hər oyunda sabit çıxış edirəm, qollar vururam, qol ötürmələri edirəm.
- Yenidən Azərbaycana qayıtmağınız mümkündür?
- Azərbaycana qayıtmağın əleyhinə olmazdım. Amma bunun üçün hansısa klubun məni heyətində görmək istəməsi vacibdir. Məsələn, "Qarabağ"la "İnter"in formasını geyməyin əleyhinə deyiləm.
- Hollandiya birinci divizionunu Azərbaycan Premyer Liqası ilə müqayisə etmək olar?
- Azərbaycanda futbol inkişaf edir. Ora güclü futbolçular gəlir. Hollandiyada isə futbol çoxdan inkişaf edib. Ona görə də müqayisə düzgün olmazdı. Ümid edirəm ki, Azərbaycanda da tezliklə hər şey yüksək səviyyədə olacaq.
- "Venlo" daha güclüdür, ya "Neftçi"?
- Belə bir müqayisə aparmaq istəməzdim. Amma onu deyə bilərəm ki, "Venlo" Hollandiyanın ən güclü klublarından biridir (gülür).
