Çingiz Abdullayev: Bizə zaman lazımdır

"Neftçi" futbol klubunun Müşahidə Şurasının sədri Çingiz Abdullayev komandada islahatlar üçün zamana ehtiyac olduğunu bildirib. Azerisport.az saytına açıqlamasında o, bunları söyləyib:

"Bu gün deyə bilmərəm ki, komandamız çempion olacaq. Sözsüz hər oyunda qələbə qazanmaq istəyirik. Lakin bizə zaman lazımdır. Şura üzvləriylə islahatlar aparılmalıdır. Bundan sonra biz konkret hədəf uğrunda mübarizə aparacağıq. İndi klubumuz uğur qazansa belə, burada bizim əməyimiz o qədər çox olmayacaq. Hazırda Müşahidə Şurasının əksər üzvləri "Neftçi"də yenidir. Bizə zaman lazımdır. Müəyyən zaman keçəndən sonra biz deyə bilərik ki, qazanılan uğurda rolumuz var. İstəyirəm ki, komandada əzmkar oyunçular çox olsun. Bir müddət hər bir futbolçu haqda informasiya toplayacağıq. Bizə müqaviləsinin sonuna qədər komanda üçün maksimum oyun göstərən futbolçular lazımdır".

Azərbaycan Kubokunun yarımfinal görüşünə gəlincə, Abdullayev "Neftçi"yə inandığını deyib: "İnter"lə oyun çətin olacaq. Ölkədə yarışan güclü klublardan biridir. Onların nəticələri haqda məlumatım var. Necə olacağını deyə bilmərəm. Amma çox istəyirəm ki, komandamız finala çıxsın. Bunun üçün azarkeşlik edəcəyik. Fikrimcə, "İnter"i udmaq üçün potensial var. Lakin futbolda heç kim dəqiq proqnoz verə bilməz".