Rəşad Eyyubov: Julius Vobay azarkeşlərimizi təxribata çəkdi
"Simurq"un hücumçusu Rəşad Eyyubovun azerisport.az saytına müsahibəsi
- "Neftçi"yə məğlubiyyəti necə şərh edə bilərsiniz?
- Çox yaxşı oyun alındı. Biz bütün komponentlərdə "Neftçi"dən üstün idik. Sadəcə, qol vura bilmədik.
- Elə sizin özünüzün yüz faizlik qol epizodunuz olsa da, fərqlənə bilmədiniz...
- Topa normal zərbə vura bilmədim. Özü də mənim bir yox, iki qol vəziyyətim oldu.
- İndi komandanız beşinci yerdə gedir. Dördüncü pilləni tutmaq nə dərəcədə vacibdir? Yoxsa siz ölkə kubokunu qazanmağa daha çox önəm verirsiniz?
- Bizi "Qəbələ"dən cəmi iki xal ayırır. Bu, elə də faciəvi göstərici deyil. Hər komanda bundan sonra 7 oyun keçirməlidir. Sadəcə, sonadək mübarizə aparmaq lazımdır. Kubok əlbəttə, vacibdir. Amma çempionatı siyahıdan silmək düz olmaz.
- "Qəbələ"nin AZAL üzərində böyük hesabla qalib gələcəyini gözləyirdiniz?
- Düzünü desəm, yox. AZAL Möhkəm komandadır. Onlara qarşı oynamaq çox çətindir. Amma futbolda hər şey olur.
- Julius Vobayla bağlı qalmaqal yaranıb. Həmin epizodda nə baş vermişdi? Siz Vobayın azarkeşlərə jest etdiyini görmüsünüz?
- O, bizim azarkeşləri təxribata çəkirdi. Onun üzr istəyib-istəməyəcəyi məni maraqlandırmır. Sadəcə, hər kəsə hörmətlə yanaşmaq lazımdır.
- Oyundan sonra Vobayla söhbətləşdiniz?
- Bəli, ona dedim ki, düzgün hərəkət etmədin.
- Amma "Simurq" azarkeşləri də son vaxtlar özlərini sakit aparmırlar. Bundan əvvəlki ev oyununuzda da AZAL-ın futbolçusu Freddi Mombonqoya qarşı irqçi təhqirlərə yol verilmişdi...
- Bizdə heç bir irqçilik yoxdur. Sizin dediyinizdən də xəbərim yoxdur.
- "Simurq"un bu mövsüm Avropa Liqasına vəsiqə qazanması nə dərəcədə realdır?
- Ümid edirəm ki, vəsiqə qazana biləcəyik. Çox yaxşı komandamız var. Digər komandalardan fərqli bizim elə də böyük büdcəmiz yoxdur. Amma belə oynamağa davam etsək, hər şey yaxşı olacaq.
