Elvin Camalov: İnanıram ki, Qriqorçuk və yeni legionerlər ilə istəyimizə çatacağıq
"Qəbələ"nin yarımmüdafiəçisi Elvin Camalovun azerisport.az saytına müsahibəsi
- AZAL-la oyuna hazırlıq necə keçdi?
- Bu oyuna çox ciddi hazırlaşmışıq. Düzdür, mən bir neçə gündür komandadan ayrı çalışırdım. Çünki zədədən sonra bərpa prosesi keçirdim. Yenicə ümumi məşqlərə qoşulmağa başlamışam.
- Xeyli müddətdir rəsmi oyun keçirməməyiniz komandaya təsir etməyib?
- Deməzdim. Əksinə, çempionatdakı gərgin qrafik zamanı belə bir fasilənin olması yerinə düşdü. Oyunlarımızı analiz edə, öz səhvlərimizi görə bildik.
- "Qəbələ" dördüncü pilləni tuta, avrokuboklara gedə biləcək?
- Əlbəttə, öz şansımızı əldən vermək istəmirik. Turnir cədvəlində mümkün qədər üst pillələrdə qərarlaşmaq istəyirik. Ona görə qarşıdakı turlarda yaxşı oynamalı, maksimum xal toplamağa çalışmalıyıq.
- Bu yolda əsas rəqibiniz "Simurq"dur...
- Biz yalnız öz oyunumuz haqda düşünürük, rəqiblərimizin necə çıxış etdiyi barədə yox. Hər oyunda qələbə qazansaq, istəyimizə çata bilərik.
- Roman Qriqorçukla legionerlər komandaya uyğunlaşa bilib?
- Bəli, uyğunlaşıblar. Artıq hər şey qaydasındadır. İnanıram ki, onlarla birgə uğur qazana biləcəyik.
