Bədavi Hüseynov: Hamının bizdən razı qalması üçün əlimizdən gələni edəcəyik

Azərbaycan yığmasının müdafiəçisi Bədavi Hüseynovun azerisport.az saytına müsahibəsi

- Malta ilə seçmə mərhələ oyununa hazırsınız?
- Bəli, yaxşı hazırlıq keçmişik. Yaxşıdır ki, oyunçular arasında zədəlisi yoxdur. Matça tam hazırıq və start fitini gözləyirik.

- Rəqib barədə nə düşünürsünüz?
- Maltanın yaxşı komandası var. Müdafiədə xüsusilə çox yaxşı oynayırlar. Rəqibi yaxşı analiz etmişik.

- Bildiyimizə görə, artıq Gürcüstan - Malta yoxlama matçı futbolçulara göstərilib...
- Bəli, həmin oyuna baxdıq. Maltalıların müdafiədən hücuma keçmələrini xüsusi qeyd edərdim. Aydın məsələdir ki, onlar Bakıda əks-hücum futbolu nümayiş etdirməyə çalışacaqlar. Buna görə diqqətli oynamağımız lazımdır.

- Bu oyunda qalib gəlmək üçün necə oynamaq lazımdır?
- İlk dəqiqələrdən aqressiv olmaq lazımdır. Necə də olmasa, evdə oynayırıq. Deməli, hücumda oynamalıyıq. Lakin rəqibin əks-hücumları zamanı da diqqətli olmağımız vacibdir.

- Azarkeşlərə qələbə sözü verə bilərsiniz?
- Hamımız qələbə qazanmaq istəyirik, bunun vacibliyini başa düşürük. Ümid edirəm ki, hər şey bizim üçün yaxşı nəticələnəcək.

- Prosineçkinin komandaya güvəndiyi hiss olunur. O, az qala bunu hər açıqlamasında bildirir...
- Doğrudan da onun bizə inandığı hiss olunur, bizi dəstəkləyir. Bu, çox vacibdir və bizə xoşdur.

- Yəqin bilirsiniz ki, qələbədən başqa istənilən nəticə azarkeşlərdə böyük məyusluq yaradacaq...
- Azarkeşlərin bizdən qələbə gözlədiyini başa düşürük. Qələbə qazanmaq, oyundan sonra hamının bizdən razı qalması üçün əlimizdən gələni edəcəyik.