Pyetro Qedin: Azərbaycan yığmasında baş verənlər bizə maraqlı deyil

Malta yığmasının baş məşqçisi Pyetro Qedin AÇ-2016-nın seçmə mərhələsi çərçivəsində Azərbaycana qarşı keçiriləcək oyun öncəsi fikirlərini açıqlayıb. Azerisport.az xəbər verir ki, o, sabah baş tutacaq oyun ərəfəsində təşkil olunan mətbuat konfransında öncə bunları söyləyib:

- Azərbaycanla oyuna yaxşı hazırlaşmışıq. Bura yaxşı nəticə ümidi ilə gəlmişik. Baxmayaraq ki, Tiflisdə keçirilən yoxlama oyununda Gürcüstana məğlub olduq.

- Komandanızda vəziyyət nə yerdədir?
- Əsas olan komandanın sabahkı oyunda özünü necə göstərməsidir. Əminəm ki, futbolçularımız bu görüşün əhəmiyyətini tam anlayırlar və sabah lazım olan səviyyədə çıxış edəcəklər.

- Azərbaycan bu oyuna seçmə mərhələdə dönüş yaratmaq gözü ilə baxır...
- Bu, bizə maraqlı deyil. Bizim öz hədəflərimiz var. Biz Bakıda Azərbaycana bir dəfə uduzmuşuq. Bizə komandanızda baş verən dəyişikliklər, indiki baş məşqçinin kim olması o qədər də önəmli deyil.

- Gürcüstanla oyundan sonra yorğunluq var?
- Əgər futbolçu 3-4 gündən bir oynamaqla özünü yorğun hiss edirsə, onun özünə başqa sənət tapması daha yaxşı olar. Uşaqlar tam olaraq qarşıdakı görüşə köklənməlidirlər. Fiziki cəhətdən tam hazır olmaq əsas məqsədimizdir. Çünki Gürcüstana səfərimiz çox yorucu oldu. Ümid edirəm ki, futbolçularımız Azərbaycannla oyuna daha yaxşı vəziyyətdə çıxacaqlar.

- Komandanız sabah nəyə ümid edəcək?
- Hər şeyi sabah meydanda öz gözlərinizlə görəcəksiniz. Bizim üçün hər bir oyun vacibdir. Ümid edirəm ki, ən azından uduzmayacağıq. Heç-heçə də bizim üçün yaxşı nəticə olardı. Amma bütün kartlarımızı açmaq fikrim yoxdur.

- Mümkün məğlubiyyət sizin üçün faciə olmayacaq?
- Biz qələbə qazanmaq üçün əlimizdən gələni edəcəyik. Mən deməzdim ki, qələbə bizə Azərbaycandan az lazımdır.

- Azərbaycan yığması barədə nə bilirsiniz?
- Güclü komandanız var. Amma çox həyacanlı görünürsünüz. Niyə? Mənə də söyləyin. Sizdə hər şey yaxşı olacaq.