Dmitri Nazarov: Qələbə bizim olacaq

Azərbaycan yığmasının və Almaniyanın "Karlsrue" klubunun hücumçusu Dmitri Nazarovun azerisport.az saytına müsahibəsi

- Malta ilə oyuna hazırlıq necə gedir?
- İlk növbədə qeyd etmək istərdim ki, mən yığmaya hamıdan gec qoşulmuşam. Çünki "Karlsrue"də oyunum var idi. Komandada yaxşı atmosfer var. Komandanın hər bir üzvü məşqlərdə maksimum güc qoyur. Uşaqlarda istək çox yüksəkdir. Bizi vacib oyun gözləyir. Yığmanın heyətində keçirdiyim oyunlarda qələbəyə sevinə bilməmişəm. Amma oyuna köklənmə yüksək səviyyədə olsa, qələbə bizim olacaq.

- Rəqib barədə nə deyə bilərsiniz?
- Ötən gün Robert Prosineçki onlar haqda bizə bir qədər danışdı. Xüsusilə də son dörd oyunda hansı heyətlə oynadıqlarını dedi. Amma düzünü desəm, onların bizə qarşı hansı heyətlə oynayacağı, hansı taktiki sxemdən yararlanacaqları mənə maraqlı deyil. Öz oyunumuzu sərgiləməyimiz daha vacibdir. Üç xalı Azərbaycanda saxlamaqla bütün ölkəni sevindirmək istəyirik.

- Prosineçki Berti Foqtsun dəvət göndərdiyi bütün futbolçuları milliyə çağırmayıb. Siz də dəvət almayacağınızı düşünmürdünüz?
- Belə bir qorxum yox idi. Çünki klubumda da əlimdən gələni edirəm. Prosineçki isə bu dəvəti ilə mənə güvəndiyini göstərdi. İndi mənə bu etimadı doğrultmaq qalır.

- Bəs siz öncə Prosineçki barədə nə bilirdiniz?
- O, böyük futbolçu idi. Vaxtilə elə mənim mövqeyimdə oynayıb. Onun oynadığı dövrdə mən uşaq idim. Amma haqqında eşitmişdim.

- Emil Balayevin Almaniya "Ayntraxt"ında möhkəmlənmək şanslarını necə qiymətləndirirsiniz?
- Mənim onuna elə bir əlaqəm yoxdur. Amma biz bir dəfə mini turnir zamanı qarşılaşmışdıq. Yaxşı qapıçıdır. "Ayntraxt"ın əsas qapıçısı Kevin Trappı yaxşı tanıyıram. Onunla eyni komandada oynamışıq. Güclü qapıçıdır. Balayevə asan olmayacaq. Amma onun Bundesliqada oynamaq şansı var.