Pyetro Qedin: Malta üçün həm Gürcüstanla, həm də Azərbaycanla oyun vacibdir

Malta yığmasının baş məşqçisi Pyetro Qedin AÇ-2016-nın seçmə mərhələsi çərçivəsində Azərbaycana qarşı keçirəcəkləri oyun öncəsi fikirlərini açıqlayıb. Azerisport.az xəbər verri ki, o, öncə bunları söyləyib:

"Bizim üçün bütün oyunlar vacibdir. İndi bütün diqqətimiz Gürcüstanla yoxlama oyununa yönəlib. Bizə addım-addım irəliləmək lazımdır".

Qedinin komandasını hansı heyətlə oynadacağı hələlik bəlli deyil. Amma onun Roderik Briffa, Pol Fenex və Rayan Fenexin xidmətindən yararlanmayacağı bildirilir. Buna səbəb onların formada olmamasıdır: "Onların kiçik zədəsi var. Amma sağalmalarında sürətli irəliləmə olduğundan meydana çıxacaqlarına azacıq da olsa, ümid var".

Qedin təxminən bir ay öncə Nigeriya vətəndaşlığını Maltaya dəyişən Alfred Effionqla da bağlı fikirlərini bölüşüb: "Effionq yığmada yenidir. Buna görə ona vaxt lazımdır ki, komandaya tam alışsın. Onun oynayacağına tam əmin deyiləm".

"Komandada çoxlu yeni futbolçunun olmasına gəlincə, bu, gənclərlə bağlı aparılan işin düzgünlüyündən xəbər verir".

Qeyd edək ki, Malta yığmasını bu gün Tiflisdə Gürcüstanla yoxlama oyunu gözləyir. Martın 28-də isə maltalılar milli komandamızın qonağı olacaqlar.