Draqan Çeran: Simurqdan ayrılmaq? Ancaq Arsenala gedərəm

"Simurq"un serbiyalı hücumçusu Draqan Çeranın azerisport.az saytına müsahibəsi

- "Simurq"un "Bakı" üzərində qazandığı 3:0 hesablı qələbə nə dərəcədə asanlıqla başa gəldi?
- Biz hesabı açdıqdan sonra oyun daha da gərgin keçdi. Rəqibə qol vurmamağa çalışırdıq. Fikrimcə, layiqli qələbə qazandıq.

- Siz öz qolunuzu qeyd etmədiniz...
- Mən normal qol vurmuşdum. Əsas klubumun qələbəsidir.

- Hazırda "Simurq" beşinci pillədə qərarlaşıb. Komandanız üçün avrokuboklara çempionatdan vəsiqə qazanması daha realdır, ya kubokdan?
- Hər iki yol normaldır. Ona görə də sonadək mübarizə aparacağıq. Bunu həm kuboka, həm də çempionata aid etmək olar.

- Qarşıda sizi avrokuboklara vəsiqə qazanmağa çalışan AZAL-la oyun gözləyir...
- Çətin oyun gözləyirəm. AZAL çox çətin rəqibdir. Amma biz ancaq qələbəyə oynayacağıq.

- Kubokun yarımfinalında sizi "Qarabağ"la oyun gözləyir. Finala çıxmaq şanslarınızı necə qiymətləndirə bilərsiniz?
- Biz finala çıxmaq üçün əlimizdən gələni edəcəyik. Futbolda hər şey ola bilər.

- Təsadüfən "Simurq"da maliyyə problemi yoxdur?
- Hələ ki, yox.

- Mövsüm başa çatandan sonra "Simurq"da qalacaqsınız, ya başqa kluba keçməyi düşünürsünüz?
- "Arsenal"a keçəcəyəm (gülür)...

- Sarandi "Arsenal"ına (Argentina), ya Tula "Arsenal"ına (Rusiya)?
- Yox, London klubuna (gülür). Arsen Venger mənə zəng etmişdi, Jiru və Özillə birgə oynamağımı istəyir. Əlbəttə, zarafat edirəm. "Simurq"da qalacağam.