Aleksey Qay: Mümkündür ki, Qəbələ fasilədən sonra daha güclü oyun sərgiləsin

"Qəbələ"nin yarımmüdafiəçisi Aleksey Qayın azerisport.az saytına müsahibəsi

- "İnter" üzərindəki qələbənizlə bağlı nə deyə bilərsiniz?
- Oyun baxımından biz rəqibdən üstün idik və layiqli qələbə qazandıq. Belə bir rəqibi onun meydanında məğlub etmək çox xoşdur. Hər şey qanunauyğun oldu.

- Vurduğunuz qol sizi sevindirdi?
- Vurulan hər bir qol xoşdur. Əsas odur ku, bu qol komandaya qələbə gətirdi.

- Bu, "Qəbələ"nin Premyer Liqada ardıcıl dördüncü qələbəsidir. Uğurlu seriyanı davam etdirə biləcəksiniz?
- Hər şey birdən-birə alınmır. Bəzi məqamlar var ki, üzərində çalışmaq lazımdır. Müəyyən vaxt lazımdır ki, nəticə qazana biləsən. Daha böyük uğurlara imza atmaq üçün daha çox da çalışmaq lazımdır. "İnter"lə oyun da buna əyani sübutdur. Amma bu oyunu unudub, növbəti görüşlər barədə düşünməliyik.

- "Qəbələ"ni mövsümün yekunlarına görə ilk üçlükdə görürsünüz?
- Düzünü desəm, mən heç düşünmürdüm ki, biz neçənci yerdəyik, kimdən nə qədər geri qalırıq. Əsas odur ki, hər oyuna çıxıb, maksimum nəticəyə imza ataq. Yekun nəticəyə isə mövsüm başa çatandan sonra bəlli olacaq.

- Ardıcıl dörd qələbə "Qəbələ"nin yeni baş məşqçi ilə öz səviyyəsini qaytardığını deməyə əsas verir?
- Bizdə hələ hər şey o dərəcədə qaydasında deyil ki, arxayınlaşaq və hər oyuna sakit çıxaq. Futbolda nəticəni öncədən müəyyənləşdirmək çox çətindir. Arxayınlaşmaq olmaz. Peşəkar olmaq lazımdır.

- "Qəbələ"nin növbəti oyunu aprelin 5-də AZAL-a qarşı olacaq. Belə bir fasilə sizə mənfi təsir etməyəcək ki?
- Əlbəttə, istərdik ki, çempionatda belə fasilə yaranmasın. Çünki yaxşı sürət yığmışdıq. Bu fasilənin komandaya necə təsir edəcəyini müəyyənləşdirmək çətindir. Bəlkə də bu fasilə komandaya daha böyük fayda versin. Təzə güclə daha yaxşı oynamağımız da mümkündür.