Vitali Borisov: Ukraynadan qisasımızı almalıyıq
Futzal üzrə Azərbaycan yığmasının üzvü Vitali Borisovun azerisport.az saytına müsahibəsi
- Danimarka üzərindəki möhtəşəm qələbə ilə bağlı nə deyə bilərsiniz?
- Oyun bizim üçün çox yaxşı bir nəticə ilə başa çatdı. Oyunun çətin keçdiyini deməzdim. İlk hissədən sonra 3:0 öndə idik. İkinci hissədə qol buraxdıq. Bu nəticə bizi qane etmədiyindən qol vurmaq üçün daha çox çalışmağa başladıq. Nəticədə darmadağınla qalib gəldik. Artıq Ukrayna ilə oyunda bizi heç-heçə də qane edəcək.
- Bu, komandanı arxayınlaşdıra bilər?
- Əlbəttə. Amma biz çətin ki, Ukrayna ilə həlledici oyunda öz qapımıza sıxışıb nəticəni qorumaqla məşğul olaq. Ənənəvi olaraq, aqressiv oyun sərgiləməyə çalışacağıq. İndi şansların 60-ın 40-a bizim xeyrimizə olduğunu demək olar. Amma bu, sürüşkən üstünlükdür.
- 11:2 hesabı sizi qane etsə də, baş məşqçi yenə meydana beşinci meydan oyunçusunu buraxdı...
- Bəzi oyunçularımızın sarı vərəqəsi var idi, bəziləri yorğun idi. Lazım olan nəticəni qorumaq üçün topu saxlamağımız lazım idi.
- Ukrayna ilə oyun barədə nə deyə bilərsiniz?
- Onların İspaniya, Portuqaliya və Çexiya ilə yoxlama oyunlarına əsasən, bu komandanın çox ciddi rəqib olduğunu demək olar. Yeni baş məşqçiləri gəldiyinə görə, yeni ideyalar, yeni heyət mövcuddur. Fikrimcə, bu komanda düzgün yoldadır. Avropanın ən yaxşı altı komandasından biridir.
- Proqnozunuz.
- Proqnoz verməyi xoşlamıram. İki güclü komandanın kompromissiz və gərgin oyunu olacaq. İkinci yeri tutmaqla pley-offda da oynamaq variantı var. Amma bizim hədəfimiz birinci yeri tutmaqdır. Artıq bir dəfə Ukraynaya qrup liderliyini uduzmuşuq. Bu dəfə qisasımızı almalıyıq. Birinci yeri tutmasaq, məyus olacağıq. Əlavə iki pley-off oyununa çıxmağımızı istəməzdim.
- İsa Atayevlə Ramiz Çovdarovun yığmada qollar vurmağa başlaması haqda nə deyə bilərsiniz?
- Əlbəttə. Bu, onların rəsmi oyunlarda yığmada vurduqları ilk qollar idi. Hər ikisini dubla imza atması münasibətilə təbrik edirəm. Ümid edirəm ki, bununla kifayətlənməyəcəklər.
