Eddi İsrafilov: Malta ilə matçı səbrsizliklə gözləyirəm

İspaniyanın "Qranada" klubunun və Azərbaycan yığmasının yarımmüdafiəçisi Eddi İsrafilovun azerisport.az saytına müsahibəsi

- İlk dəfə Azərbaycan yığmasına dəvət olunan futbolçular sırasında yer aldınız. Bu barədə ilkin fikirlərinizi bilmək maraqlı olardı...
- Bu anı çoxdan gözləyirdim. Azərbaycan yığmasına böyük ümidlərlə və öz gücümə inanaraq gəlirəm. Öz ölkəm üçün oynamaq istəyirəm. İlk oyunu böyük səbrsizliklə gözləyirəm. "Qranada"nın heyətində təkcə İspaniya çempionatının oyunlarına yox, həm də AÇ-nin seçmə mərhələ oyununa hazırlaşıram. Malta ilə görüşə həm fiziki, həm də psixoloji cəhətdən hazır olmaq istəyirəm.

- Zədə səbəbindən xeyli müddət oynamamısınız. Martın 28-nə qədər nə dərəcədə hazır olacaqsınız?
- Mən artıq hazıram. Xeyli müddətdir komanda ilə birgə məşq edirəm. Problem görmürəm. Özümü çox yaxşı hiss edirəm.

- Malta ilə oyun baş məşqçi Robert Prosineçki kimi, sizin üçün də ilk olacaq. Bu oyun həm də millimizin seçmə mərhələdə ilk qələbəsini qazanmaq şansıdır...
- Bu oyunun hamımız üçün nə dərəcədə vacib olduğunu anlayıram. Ümid edirəm ki, hər şey yaxşı alınacaq və səfərim uğur gətirəcək. Prosineçkinin istənilən qərarını öyrənib, onu meydanda həyata keçirməyə hazıram. Qələbə üçün əlimdən gələni edəcəyəm.

- Sizi nə vaxt yenidən "Qranada"nın əsas heyətində görəcəyik?
- Bu, məşqçidən asılıdır. Düzdür, mən iki ay zədə səbəbindən oynamadım. Amma hazırda yaxşı formadayam. Mənə nə vaxt şans verəcəklərini gözləyirəm.

- Mövsümün sonunda "Qranada" ilə icarə müqavilənizin müddəti başa çatacaq və yenidən "Mursiya"ya qayıtmalı olacaqsınız. Planlarınız nədir?
- Hələ bilinmir. "Qranada" məni transfer hüququmu almaq şərtilə icarəyə götürüb. Amma hazırda bu, müzakirə mövzusu deyil. İyundan sonra bu barədə danışarıq.