Branimir Subaşiç: Türkiyə klublarından təklif olsa da, özüm Azərbaycana qayıtmaq istəyirəm
Azərbaycan yığmasının sabiq hücumçusu Branimir Subaşiçin azerisport.az saytına müsahibəsi
- Türkiyənin "Manisaspor" klubundakı işləriniz deyəsən, o qədər də yaxşı getmir...
- Bəli. Mövsümün əvvəlindən belədir. Sadəcə, mən nəyinsə dəyişəcəyinə ümid edirdim. Əlbəttə, pul hər şey demək deyil. Amma kimsə məni aldadanda, bundan qətiyyən xoşlanmıram. Əvvəllər dözürdüm, amma indi yox. Komandada əksəriyyət gənclərdir və heç kim bir söz demir.
- Klub prezidenti ilə söhbət etmisiniz?
- Rəhbərlik danışıqlardan qaçır. Bir neçə dəfə klub prezidenti il danışmışam. O, hər şeyin yaxşı olacağını deyib. Amma hər şey əksinədir. Artıq heç soruşmuram.
- Deyilənə görə, siz Azərbaycana qayıdırsınız...
- Əvvəllər klubumdan şikayət edib, Türkiyəni tərk etmək istəyirdim. Amma bunu etmədim. İndi də istəmirəm. Gözləyirəm. Əgər aldatmasalar, sözlərinə əməl etsələr, söz vermişəm ki, heç nə etməyəcəyəm.
- Bəs yayda nə etməyi düşünürsünüz?
- Yayda komandamı dəyişəcəyim dəqiqdir. Yenidən Premyer Liqaya qayıtmaq istəyərdim. Türkiyə klublarından təkliflər çoxdur. Amma mən Azərbaycana qayıtmaq istəyirəm.
- Yəqin ki, iddialı klubda oynamaq istəyirsiniz...
- Baxarıq. Hələ klub adı çəkə bilmərəm.
- Adınız daha çox "İnter"lə yanaşı hallandırılır...
- Bu barədə heç nə deyə bilmərəm.
- Azərbaycan yığmasının Malta ilə oyununa dəvət almaq şansınızı nə dərəcədə yüksək qiymətləndirə bilərsiniz?
- Düşünmürəm ki, mənə dəvət göndərsinlər. Mənə heç kim zəng etməyib, maraqlanmayıb. Ona görə Malta ilə oyuna dəvət almayacağıma yüz faiz əminəm. Mətbuatı da izləyirəm və görürəm ki, baş məşqçi Robert Prosineçkidən mənimlə bağlı heç nə soruşmurlar.
- Unudulduğunuzu düşünürsünüz?
- Elə çıxır.
- Bəs millimizin Malta ilə oyunundan nə gözləyirsiniz?
- Matçın necə bitəcəyini indidən proqnozlaşdıra bilmərəm. Amma hər şeyin milli üçün yaxşı olacağını düşünürəm. Komanda yaxşı nəticə qazanmağa borcludur.
- Yəni millimiz Maltadan o dərəcədə güclüdür ki?
- Ola bilər ki, çox güclü deyil. Amma məncə, Azərbaycan çempionatı Malta birinciliyindən güclüdür. Həm də yığmamızda yeni baş məşqçi var. Komandada yeni enerji hiss olunmalıdır, oyunçular özlərinə inanmalıdırlar.
