Rafael: Qrupumuzda məğlub edə bilməyəcəyimiz rəqib yoxdur

Futzal üzrə Azərbaycan yığmasının üzvü Rafaelin azerisport.az saytına müsahibəsi

- Azərbaycan yığması seçmə mərhələ oyunlarına hazırdır?
- Son Avropa çempionatında biz çox pis çıxış etdik. İtaliyaya böyük hesabla uduzduq. Bu üzdən indiki seçmə mərhələ bizim üçün çox vacibdir. Rəqiblərimizi doğma meydanda qəbul edəcəyik. Komanda azarkeşlərimiz qarşısında oynamağa hazırdır.

- Son AÇ zamanı komandaya Joze Alesio rəhbərlik edirdi, indi isə Tino Peres. Komandada çox şey dəyişib?
- Alesio yaxşı məşqçi və yaxşı oğlan idi. Amma son turnirdə futbolçular arasında münaqişə var idi. Komanda buna görə oynamadı. Bu, baş məşqçinin günahı deyildi. Hər şeydə futbolçular günahkar idi.

- Bəs problem braziliyalı futbolçularda idi, ya yerlilərdə?
- Braziliyalılarda. Biz Azərbaycana bu komandaya kömək etmək üçün gəlmişik. Artıq baş verənlər hamısı geridə qalıb. İndi hər şey tam fərqlidir. Tino Peres bizi yaxşı hazırlayıb. Bir daha təkrar edirəm ki, problem Alesioda yox, braziliyalı futbolçularda idi.

- Bu seçmə mərhələdə daha çox hansı komandadan çəkinirsiniz?
- Belçika və Ukrayna bizim əsas rəqiblərimizdir. Danimarkaya da təbii ki, ciddi yanaşmalıyıq. Amma bu komanda digərləri qədər təhlükəli deyil. Ukrayna güclü oyunçulara malikdir. Ukrayna yığmasının dörd oyunçusu Azərbaycanda çıxış edir. Onlar bizi yaxşı tanıyırlar.

- Bu gün keçiriləcək Belçika ilə oyundan nə gözləyirsiniz?
- Qələbə qazanmaq lazımdır. Turnirlərdəki ilk oyunlar həmişə çətin keçir. Öz meydanımızda oynadığımıza görə, mütləq qələbə qazanmalıyıq. Bu gün qalib gəlsək, qarşıya qoyulan məqsədə çatmaq daha da asanlaşacaq.

- Federasiya prezidenti qrupdan birinci yerlə çıxmağın əsas hədəf olduğunu bildirib...
- Komanda birinci yer uğrunda mübarizə aparacaq. Bizim qrupda məğlub edə bilməyəcəyimiz rəqib yoxdur. Belə olan halda qarşımıza maksimum xal toplamağımız lazımdır.