Roman Qriqorçuk: Turnir cədvəlindəki yerimizi bəyənmirəm
"Qəbələ"nin baş məşqçisi Roman Qriqorçukun azerisport.az saytına müsahibəsi
- Komanda Zaqataladakı kubok oyunundan sonra toparlana bilib?
- Son dövrlər gərgin qrafiklə oynasaq da, növbəti matça hazırlığı davam etdiririk. Komandanı növbəti görüşə tam hazır etmək üçün əlimizdən gələni edirik. Dododan başqa bütün futbolçular sıradadır. Ümid edirik ki, yaxşı futbol sərgiləyəcəyik.
- Braziliyalının yoxluğu komandaya nə dərəcədə təsir edəcək?
- Dodo komandamızda vacib fiqurlardandır. Təbii ki, onun yoxluğu mənfi məqamlardandır. Amma futbolda zədəli və cəzalılar da qaçılmazdır. Ona görə də istənilən futbolçunu əvəzləməyə hazır olmalıyıq.
- Rəqib ambisiyalı və güclüdür. "İnter"lə oyunda "Qəbələ" nəyə ümid edir?
- Sözlərinizi təsdiqləyirəm. "İnter" çox ciddi, yaxşı təşkilatlanmış komandadır. Məşqçi əli hiss olunur. Amma biz istənilən halda müsbət nəticəyə ümidliyik. Şanslar əllinin əlliyədir.
- Rəqibi nə dərəcədə tanıyırsınız?
- Onlar maraqlı taktika ilə çıxış edirlər. Adətən, üç mərkəz müdafiəçisi ilə oynayırlar. Buna da hazır olmaq lazımdır. Oyunun gedişində iki variantdan istifadə etdikləri diqqətimi çəkib.
- Turnir cədvəlinə baxanda nə düşünürsünüz?
- Sizə düzünü deyim ki, turnir cədvəlinə baxmıram. Çünki bunu bəyənmirəm. Ən çox da "Qəbələ"nin yerini. Başa düşürəm ki, mənim ora baxmağımla heç nəyi dəyişmək olmaz. Biz addım-addım irəliləyirik. Biz sadəcə, öz oyunumuzu yaxşılaşdırmalı və hər oyundan 3 xalla ayrılmalıyıq.
- Ukraynanın futzal üzrə yığma komandası AÇ-2016-nın seçmə mərhələsi çərçivəsində Bakıda oyunlar keçirəcək. Bu idman növü sizə nə dərəcədə maraqlıdır? Komandanızın oyunlarına baxmağa hazırlaşırsınız?
- Futzala baxmağı xoşlamıram. Çətin ki, məni orada görərsiniz. Onsuz da işlərim kifayət qədərdir. Belə mərasimlərə vaxt itirə bilmərəm. Amma belə öz ölkəmi sevirəm və Ukrayna yığmasına da turnirdə uğurlar arzulayıram.
