Zaur Axundov: Peres özü də başa düşür ki, bu, onun ilk ciddi sınağıdır
Azərbaycan Futzal Federasiyasının prezidenti Zaur Axundovun azerisport.az saytına müsahibəsi
- Azərbaycan yığmasının 2015-ci ildəki ən ciddi sınağına hazırlığı necə gedir?
- Bu gün hazırlıq prosesi başa çatacaq. Sabah komandanı yüngül məşq gözləyir. Vitali Borisovun yüngül zədəsi var. Amma həkimlərin köməyi sayəsində o, martın 18-dəki oyuna tam hazır olacaq. AFFA hər cür köməyini göstərir. Bir neçə toplanış keçirdik. Azərbaycan yığması seçmə mərhələyə tam hazırdır.
- Son üç Avropa Çempionatı Azərbaycan yığmasının iştirakı ilə keçirilib. Bu dəfə necə olacaq?
- Ardıcıl dördüncü dəfə AÇ-də iştirak etmək bizim planlarımız daxilindədir. Komanda qarşısında qrup birincisi olmaq vəzifəsi qoyulub. Belqrada vəsiqəni qrup lideri kimi qazanmaq istəyirik. Azarkeşləri də "Sərhədçi" İdman Kompleksinə dəvət edirəm. Komandaya dəstək lazımdır.
- Komandamızın Ukrayna, Belçika və Danimarkanı keçmək gücü var?
- Danimarka bu qrupa ilkin mərhələdən gəlib. Belçika və Ukrayna isə daha güclü rəqiblərdir. Asan olmayacaq. Amma evdə oynamağımız özünü göstərməlidir. Qeyd etdiyim kimi, biz qrup lideri kimi AÇ-yə vəsiqəni Bakıda həll etmək istəyirik. Daha sentyabrda keçiriləcək pley-off oyunlarına qalmaq fikrimiz yoxdur.
- Amma yəqin ki, ən pis variant kimi, qrup ikincisi olub pley-offda oynamaq da olar...
- Şübhəsiz. Çünki qrup birincisi olmağı qarşısına vəzifə qoyan tək biz deyilik. Məsələn, Ukraynanı götürək. Onların həmişə güclü yığması olub. Biz gəncləşdirmə siyasəti aparmışıq. Komandaya 6-7 gənc futbolçu cəlb olunub. Onların komandaya uyğunlaşması üçün zamana ehtiyac var. Bunun üçün biz hətta Azərbaycan yığmasının ikinci komandasını da yaratmışıq.
- Bəs ümumiyyətlə qrupdan çıxa bilməsək, necə olacaq?
- Bizim Tino Pereslə müqaviləmizin müddəti mayın sonunda başa çatacaq. O, ölkəmizə yeni gəlib. Dərhal nəticə gözləmək düzgün olmaz. Mayın sonunda onun işinə qiymət verəcəyik və AFFA ilə birgə qərarımızı verəcəyik.
- Yəqin ki, ona qiyməti seçmə mərhələdəki nəticəyə görə verəcəksiniz. Uğursuzluq halında onunla müqavilə imzalayacaqsınız?
- Biz belə fikirləri ağlımıza gətirmirik. Tino Peres təcrübəli mütəxəssisdir. O, özü də başa düşür ki, Azərbaycan yığmasının sükanı arxasındakı ilk ciddi sınağına çıxır. Bu üzdən o, bütün təcrübəsini işə salmalı və uğur qazanmağa çalışmalıdır.
