Vüqar Nadirov: Bakıya daha çox qol vurmaq istəyirdim

"Qarabağ"ın hücumçusu Vüqar Nadirovun azerisport.az saytına müsahibəsi

- "Bakı"ya cavab oyununda da qalib gəldiniz...
- "Bakı"nın vurduğu erkən qol bizim üçün əlavə motivasiya oldu. Nəticədə vaxtında toparlandıq və inamlı qələbə qazandıq. Bizə bu oyunda qələbə çox lazım idi. Amma rəqibin də haqqını vermək lazımdır. İlk oyunda məğlub olmaqlarına baxmayaraq, onlar cavab görüşündə müsbət nəticə qazanacaqlarına ümid edirdilər.

- Siz bu oyunda het-trikə imza atdınız. Bu, karyeranızda neçənci het-trikdir?
- Düzünü desəm, dəqiq xatırlamıram. İkinci, ya da üçüncü olmalıdır. Axı bir oyunda üç qolu tez-tez vurmaq olmur.

- Üçüncü qoldan sonra da fərqlənmək istədiyiniz hiss olunurdu...
- Bəli, etiraf edim ki, daha çox qol vurmaq istəyirdim.

- Bu het-trikdən sonra sizin yığmamızın Malta ilə seçmə mərhələ oyununda əsas heyətdə yer alacağınızı demək olar?
- Əsas heyətdə və ya sonradan meydana çıxmağım o qədər də vacib deyil. Əsas komandamızın uğurlu çıxış etməsi, nəticə qazanmasıdır.

- Yarımfinalda "Simurq"la qarşılaşacaqsınız. Ümumiyyətlə, "Qarabağ"ın kubokdakı hədəfi nədən ibarətdir?
- Hazırda yalnız "Sumqayıt"la çempionat oyununu düşünürük. Kubok oyunları apreldə olacaq. Ona görə düşünmək üçün hələ xeyli zaman var.

- Mövsümün sonunda klubla müqavilənizin müddəti bitəcək. Rəhbərliklə bu barədə söhbətiniz olmayıb?
- Xeyr. Amma danışmaq üçün vaxtımız var. Düşünmürəm ki, buna görə hansısa problem yaransın.