Namiq Yusifov: Azacıq arxayınlaşan kimi problemlər yaranır

"Qarabağ"ın yarımmüdafiəçisi Namiq Yusifovun azerisport.az saytına müsahibəsi

- Bu gün sizi "Bakı" ilə cavab oyunu gözləyir. Sizin yarımfinala vəsiqəni ilk oyunda həll etdiyinizi demək olar?
- Yox. Biz buna elə yanaşmırıq. Ola bilər ki, ilk oyunda inamlı qələbə qazandığımıa görə şansımız çoxdur. Amma bu baxımdan cavab oyunu da vacib əhəmiyyət daşıyır. Meydana yalnız qələbə üçün çıxacağıq.

- "Qarabağ" bu mövsüm qızıl dubl edə bilər?
- Bunu kim istəməz ki? Allah eləsin ki, alınsın. Amma bunun üçün üzərimizdə çox çalışmalıyıq.

- Son turda "Xəzər Lənkəran"ı çətinliklə məğlub etməyinizin səbəbi nədir?
- "Xəzər Lənkəran" bizim üçün həmişə ciddi rəqib olub. Bu komanda indi də asan məğlub ediləsi kollektivlərdən deyil. Hər oyuna tam ciddi hazırlaşmaq lazımdır. Azacıq arxayınlaşan kimi problemlər yaranır. Düzdür, "Xəzər Lənkəran"la oyunda arxayınlıq yox idi. Xeyli qol vəziyyəti yaratsaq da, sadəcə, birindən yararlana bildik. Əsas da odur ki, qalib gəldik, 3 xal qazandıq.

- Demək olar ki, bundan sonra çempionluq mübarizəsi "İnter"lə "Qarabağ" arasında gedəcək?
- Biz ilk növbədə öz oyunumuza diqqət yetirməliyik. Maksimum xal toplamaq lazımdır.

- Çox az adam "İnter"in sizə çatacağına ümid edir...
- Qarşıda hələ çox oyun var. Ona görə də heç bir halda arxayınlaşmaq olmaz. Son oyunadək meydana qələbə üçün çıxacağıq.

- "Qarabağ"ın yeni transferi Dani Kintana barədə nə deyə bilərsiniz?
- Pis futbolçu olsaydı, "Qarabağ" onunla müqavilə bağlamazdı. Ümid edirəm ki, o, öz sözünü meydanda deməyi bacaracaq.

- Sizi əvvəllər meydanda daha çox görsək də, son vaxtlar az oynayırsınız...
- Bu, baş məşqçinin qərarıdır. Mən formada qalmağa çalışıram və şansımı gözləyirəm. Hər şey yaxşıdır. Ümid edirəm ki, bundan da yaxşı olacaq.