Mahmud Qurbanov: Reytinq mövqeyimizin futbolçulara nə qədər maraqlı olduğunu deyə bilmərəm
Azərbaycan yığmasının məşqçisi Mahmud Qurbanovun azerisport.az saytına müsahibəsi
- Azərbaycan yığması FİFA-nın reytinq cədvəlində yenə geriləyərək 13-cu pilləyə düşdü...
- Çox pis. Şərh ediləcək bir şey də yoxdur.
- Ötən il komandamız siyahıda ilk yüzlükdə idi. Bəs nə baş verdi ki, belə geriləmək məcburiyyətində qaldıq?
- Seçmə mərhələdə keçirdiyin dörd oyunun hamısında məğlub olursansa, belə aqibətlə üzləşməyə də razılaşmalısan. Başqa səbəb yoxdur. Əgər uduzmağa davam etsək, reytinqdəki mövqeyimiz daha da pis olacaq.
- Bu reytinq yığmada çıxış edən futbolçular üçün nə dərəcədə önəmlidir?
- Futbolçular da komandamızın neçənci yerdə qərarlaşdığını eşidib öyrənirlər. Amma bu, onlar üçün nə dərəcədə maraqlıdır, onu deyə bilmərəm. Hər kəsin öz fikri ola bilər.
- Bəs siz oynayanda sizə nə dərəcədə maraqlı idi?
- Şəxsən mən mütəmadi izləyirdim. Aşağı pillələrdə yer alanda mənə mənfi təsir edirdi. 139-cu pillə bizim mövqeyimiz deyil. Qarşıdakı Malta ilə oyunda qələbə qazanıb, mövqeyimizi yaxşılaşdırmalıyıq.
- Yığmamızın Malta ilə oyun üçün heyəti nə vaxt açıqlanacaq?
- Robert Prosineçkinin planlarından danışa bilmərəm. Amma böyük ehtimalla martın 18-dən sonra açıqlanar. Həmin gün Topaz Premyer Liqasında 26-cı turun oyunları keçiriləcək.
- Kamran Ağayev "Kayserispor"dakı son oyununda inamlı təsir bağışladı. Məşqçilər korpusu onun çıxışını izləyir?
- Biz bütün futbolçuları izləyirik. Bütün futbolçular oyun təcrübəsinə malik olmalıdırlar. Bu, bizim əsas tələbimizdir. Əgər Kamran da oynamağa davam etsə, milliyə dəvət alacaq.
- Malta ilə oyun Prosineçkinin ilk rəsmi sınağı olacaq. Sizə elə gəlmir ki, heyəti müəyyənləşdirərkən yerli məşqçilər - sizinlə Elxan Abdullayevin də üzərinə böyük məsuliyyət düşür?
- Biz həmişə ona düzgün və lazımlı informasiya verməyə çalışırıq. Digər tərəfdən xorvatiyalı mütəxəssis özü də oyunlara gedir və kimin nəyə qadir olduğunu yaxşı bilir. Azərbaycan yığmasında yerli və ya əcnəbi məşqçi anlayışı yoxdur. Biz hamımız komandanın uğuru üçün çalışırıq.
