Kərəmyan: Azərbaycan və Ermənistan yığmaları dost münasibətdə olmalıdır
Futbol üzrə Ermənistan yığmasının üzvü, "Pünik"in, Rumıniyanın "Timişioara", "Rapid" və "Styaua" klublarının sabiq yarımmüdafiəçisi Artavazd Kərəmyanın azerisport.az saytına müsahibəsi
- Erməni idmançıların Bakıda keçiriləcək ilk Avropa Oyunlarına gəlməsinə necə baxırsınız?
- Burada qeyri-adi heç nə görmürəm. Məncə, bu, normaldır. Bizim atletlərin Bakıda nə dərəcədə uğurlu çıxış edəcəyini bilmirəm. Amma onların bu səfəri məni qətiyyən məyus etmir.
- Amma bu ölkələrin futbol yığmaları arasındakı oyunlar heç cür alınmamışdı...
- Mənə elə gəlir ki, biz gec-tez UEFA-dan belə bir razılıq alacağıq. Bu, bizim ancaq xeyrimizə olacaq. Futbolçuların bir-birinə qarşı aqressiv köklənməsinə də səbəb görmürəm. Şəxsən mən tərəfdən heç bir aqressiya olmayacaq.
- AÇ-2008-in seçmə mərhələsində iki ölkə yığmasının bir qrupa düşməsini xatırlayırsınız?
- Əlbəttə. O zaman Polşa birinci oldu. Biz hamımız Azərbaycanla oynamağa hazırlaşırdıq.
- Xüsusi hazırlaşırdınız?
- Xeyr. Finlandiya və Polşaya qarşı necə hazırlaşırdıqsa, Azərbaycanla da oyuna eyni dərəcədə hazırlaşmışdıq.
- Azərbaycanla oyuna hazır idiniz?
- Əlbəttə. Amma o vaxt prezidentimiz qərar verdi ki, səfərə getmək lazım deyil. Düşünmürəm ki, Bakıda hansısa problemlə üzləşəcəkdik. Biz idmançıyıq və siyasətlə heç bir əlaqəmiz yoxdur.
- Əminsiniz?
- Bəli. Biz çıxıb öz futbolumuzu oynayacaqdıq. Qalib gələn də təbrik olunacaqdı.
- Yəni siz qadağanın götürülməsinin tərəfdarısınız?
- Şübhəsiz. Komandalarımız bir-biri ilə dost münasibətdə olmalıdır. Biz həmişə dost olmuşuq. Yadıma gəlir ki, İrəvanda mənim xeyli azərbaycanlı dostlarım, tanışlarım var idi. Əminəm ki, həmin dövrlər yenidən qayıdacaq.
- İndi azərbaycanlı dostunuz var?
- Xeyr.
- Bakıya gəlməkdən qorxmazsınız?
- Xeyr. Mən "Timişoara"nın heyətində Türkiyədə olmuşam və heç bir problemlə üzləşməmişəm. Birlik Kubokunda "Pünik"lə "Neftçi" arasındakı oyunu da xatırlayıram. Düzdür, həmin oyunda kiçik problemlər olmuşdu, amma ciddi bir şey yox idi. Amma mənə inanın ki, bizim xalqlarımız yenə də sülh şəraitində yaşayacaqlar. Bu yolda ilk addımın futbolçular tərəfindən atılmasına çox sevinərdim.
