Tərlan Əhmədov: Cəriməni onun mükafatından tutacağıq
AZAL-ın baş məşqçisi Tərlan Əhmədovun azerisport.az saytına müsahibəsi
- AFFA İntizam Komitəsi Rəşad Abdullayevi "Bakı" ilə son oyundak davranışına görə 3 oyunluq cəzalandırdı. Siz bu qərarla razısınız?
- Çıxarılan qərara hörmətlə yanaşırıq. Abdullayevin orada nə dediyini eşitməmişəm. Amma hakim yaxın idi və yəqin ki, hər şeyi eşidib. Oyundan sonrakı mətbuat konfransında da bildirdim ki, Rəşad günahkardı və belə hərəkət etməməli idi.
- Futbolçunun özü ilə söhbət etmisiniz?
- Bəli, bu gün söhbət etdik. Dedim ki, buna görə cərimələnəcəksən.
- Maaşından kəsəcəksiniz?
- Xeyr. Biz heç vaxt futbolçunun maaşını kəsmirik. Bu, onların puludur, onunla ailələrini dolandırırlar. Onun mükafatından kəsəcəyik.
- Üç gün sonra sizi "Neftçi" ilə kubokun cavab oyunu gözləyir. Hazırlıq necə gedir?
- Təəssüf ki, Xuan Fransisko bu oyunu buraxacaq. Viktor İqbekoyinin də problemi var. Amma hər şeyə rəğmən, hazırlaşırıq. "Neftçi" ilə oyuna optimal formada çıxmağa çalışacağıq. Yarımfinala çıxmaq üçün əlimizdən gələni edəcəyik.
- İlk oyundakı qolsuz heç-heçədən sonra AZAL-ın mərhələ adlamaq şansları nə dərəcədə yüksəkdir?
- Çox çətin olacaq. Qonaqların vuracağı hər qol ikiyə bərabər olacaq. Bu üzdən bizim yalnız qələbə qazanmağımız lazımdır ki, mərhələ adlayaq.
- AZAL həm çempionat, həm də kubokdan avrokuboklara vəsiqə əldə edə bilər. Şəxsən sizin üçün hansı turnir prioritet təşkil edir?
- Bizim üçün hər iki turnir çox vacibdir. Bundan istifadə etməyimiz lazımdır. Hər ikisində sonadək mübarizə aparmağa çalışacağıq. Hansı yolun bizi avrokuboklara aparacağını isə mövsümün sonunda görəcəyik.
