Qara Qarayev: Qızıl dubla imza atmaq yaxşı olardı, amma biz indidən bu barədə düşünmürük
Azərbaycan yığmasının və "Qarabağ"ın yarımmüdafiəçisi Qara Qarayevin azerisport.az saytına müsahibəsi
- "Qarabağ"ın artıq ölkə kubokunun yarımfinalına çıxdığını və "Qəbələ" - "Simurq" cütünün qalibini gözlədiyini demək olar?
- Birmənalı şəkildə yox. "Bakı" ilə oyunda inamlı qələbə qazandıq. Amma bu, o demək deyil ki, biz yarımfinal barədə düşünməliyik. Qələbə bizi arxayınlaşdırmamalıdır. Qarşıda bizi hələ cavab oyunu gözləyir. Cavab görüşünə də ilk oyundakı qədər ciddi yanaşmalıyıq.
- Daha böyük hesabla qalib gəlmək olardı?
- Bu, sifarişlə deyil ki. Biz hər bir görüşə ciddi yanaşırıq. Belə olmasa, biz kubokdan kənarda da qala bilərik.
- Komandanız həm çempionatda, həm də kubokda inamlı oynayır. "Qızıl dubl" barədə düşünmürsünüz?
- Bu, mənim üçün ilk belə uğur olar. Əminəm ki, gözəl hissdir. Amam bu barədə indidən düşünməmək daha yaxşı olardı. Daha çətin oyunlarımız hələ qarşıdadır.
- Martın 8-də sizi "Xəzər Lənkəran"la oyun gözləyir...
- Bu komandanın heyətində çoxlu gənc futbolçu var. Amma belə komandalara qarşı oynamaq çətin olur. Çünki gənclər çox istəkli olurlar, meydanda çox çalışırlar. Hər şeyə rəğmən, 3 xal qazanmağa çalışacağıq.
- Komandanızın yeni transferi Dani barədə nə deyə bilərsiniz?
- Mən onu ancaq məşqlərdə görmüşəm. Pis təsir bağışlamır. Amma əsl potensialını oyunlar zamanı görəcəyik. Onun hələ komandaya uyğunlaşması lazımdır. Ümid edirəm ki, növbəti mövsümdə bizə kömək edə biləcək.
- Artıq Malta ilə seçmə mərhələ oyunu barədə düşünməyə başlamısınız?
- Bu oyun öncəsi həyacandan daha çox məsuliyyət hissi var. Klubda məşq edərkən də Malta ilə oyunu düşünürəm, özümü motivasiya etməyə çalışıram ki, daha yaxşı hazırlaşım, hazır olum.
- Sizcə, Robert Prosineçki sizə əsas heyətdə yer ayıracaq?
- Yaxşı forma olsam, oynamalıyam. Çalışıram ki, Prosineçkinin heyətində mənim də adım olsun. "Şaxtyor"la görüşdə əsas heyətdə idim. Prosineçkidən əvvəl də yığmada oynayırdım. O, mənim komandaya kömək edəcək gücdə olduğuma inanır. Bu, məni çox sevindirir və ruhlandırır.
