Ruslan Qurbanov: Baş məşqçiyə deyəcəyəm ki, hücumda oynamaq mənə rahat deyil

Azərbaycan yığmasının və Xorvatiyanın "Hayduk" klubunun hücumçusu Ruslan Qurbanovun azerisport.az saytına müsahibəsi

- "Hayduk"da debüt matçınız barədə nə deyə bilərsiniz?
- Sağ olun ki, mənim çıxışımı diqqət mərkəzində saxlayırsınız. Bu, çox xoşdur. Debüt etdiyim üçün şadam. İkinci hissədə meydanda oldum. Baş məşqçi mənə güvəndi və əsas odur ki, komandamız qalib gələrək növbəti mərhələyə adladı. Artıq çempionat oyununa hazırlaşırıq.

- Baş məşqçi sizi meydana buraxanda nə tapşırdı?
- Dedi ki, hücumun sivri ucunda oynamalısan. Amma mənə yarımmüdafiənin sol cinahında oynamaq daha rahatdır. Bu gün baş məşqçi ilə bu barədə söhbət edəcəyəm.

- "Hayduk"un növbəti oyunlarında da meydana çıxacağınıza inanırsınız?
- Yeni komandama tam alışmaq üçün daha bir neçə oyun keçirməyim lazımdır. Öz üzərimdə daha çox çalışacağam ki, heyətə tez-tez düşüm, baş məşqçinin mənə olan etimadını doğruldum.

- Split şəhəri və "Hayduk" necə təsir bağışlayır?
- Burada gözəl atmosfer var. Bütün şəhər futbolla yaşayır. Mənim belə bir komandada çıxış etməyim bütövlükdə Azərbaycan futbolu üçün də müsbət haldır. Çünki ölkəmizdə çoxlu istedadlı oyunçu var ki, Avropada çıxış edə bilərlər. Mümkünsüz heç nə yoxdur. Sadəcə, özlərinə inanmaları lazımdır.

- "Hayduk"un əsas heyət oyunçusu Sandro Qotalanın zədəli olması sizin əsas heyətə yolunuzu açır?
- Ona tezliklə sağalmağı arzulayıram. Bir daha qeyd etmək istərdim ki, mənim üçün yarımmüdafiənin solunda oynamaq daha rahatdır, nəinki hücumun sivri ucunda. Hücumda özümü o qədər də yaxşı hiss etmirəm.

- Azərbaycandan sizi yeni klubunuzdakı debütünüzə görə təbrik edən olub?
- "Neftçi"dən olub. Bu klub məni həmişə dəstəkləyib.