Hafiz Məmmədov: Bakının maliyyə problemi yoxdur, bizə borcu olanlar var
"Bakı"nın prezidenti Hafiz Məmmədov klubun hazırkı durumu ilə bağlı sualları cavablandırıb. Azerisport.az sizi həmin müsahibə ilə tanış edir.
- "Bakı"da hazırda vəziyyət nə yerdədir?
- Bizdə maliyyə problemi yoxdur. Amma bizə borcu olanlar var. Söhbət böyük pullardan gedir. İndi onların bizə olan borcunu qaytarmasını istəyirik. Artıq bizə borcu olanların adını mətbuat vasitəsilə açıqlamaq məcburiyyətindəyəm. Məsələn, "Xəzər Lənkəran"ın sponsoru "Palmali" şirkəti. Xüsusən, cənab Ələddin bəyin adını çəkmək istərdim. Hansı ki, uzun müddətdir onu tapa bilmirəm. Bundan hətta klub prezidenti Mais Mənsimovun da xəbəri var. Mübariz Mənsimovu narahat etmək istəmirəm. Çünki bu danışıqları Ələddin bəylə aparmışıq. Onlar vaxtilə bizdən böyük məbləğdə pul götürdülər. İndi isə biz həmin pulun qaytarılmasını istəyirik. Çünki "Lans"a maliyyə dəstəyi lazımdır. Son zamanlar bu komanda ilə azarkeşləri arasında münasibətlər heç də qaydasında deyil. Eyni sözləri fanatların mənə, klub prezidenti Jerve Martelə münasibətinə də aid etmək olar. Sabah "Lans"ın oyunu var. Heç olmasa sabahadək bank zəmanəti almalıyıq. Maksim bazar ertəsi günü səhərədək vaxtımız var ki, bu pulu alıb, problemi yoluna qoyaq. Biz Azərbaycanın Fransada təbliğatı yolunda əlimizdən gələni edirik. Amma belə nüanslar bizə mane olur.
- Hansı məbləğdən söhbət gedir?
- Mən borcun məbləğini açıqlamaq istəmirəm. Amma mən bu borcun qaytarılması üçün çox gözlədim. Məhz bu borclar qaytarılmadığına görə belə vəziyyətlə üzləşdik. Bizim maliyyə problemimiz yoxdur. Sadəcə, alınan borcların qaytarılmasını gözləyirik.
- "Bakı" yeni mövsümdə çıxış edəcək?
- Komanda növbəti mövsümdə daha yaxşı və güclü heyətlə çıxış edəcək. Heyətdəki dəyişiklikləri siz də görəcəksiniz. Rəhbərliyin heç bir maliyyə problemi yoxdur. Əgər borcumuzu qaytarsalar, biz komandanın da vəziyyətini yaxşılaşdıracaağıq. Bizə borcu olanlar arasında Premyer Liqanın üç iştirakçısının sponsoru da var.
- "Atletiko" və "Lans"la müqavilələrin müddəti artırılacaqq?
- "Atletiko" ilə müqavilənin müddəti mvsümün sonunda başa çatacaq. Amma bu klubla işbirliyinin davam etməsini istəyirik. Onlar da əməkdaşlığa hazırdılar. Hətta əvvəlkindən də az məbləğə. "Lans"ın aksiyaları isə bizə məxsusdur. Azərbaycanın Fransadakı təbliğatını daha da gücləndirmək üçün bu komandanın da inkişafına kömək etməliyik.
- Mətbuatda belə bir iddia yayılmışdı ki, "Bakı" ilə Azərbaycan Qolf Federasiyası arasında münaqişə yaranıb...
- İlk növbədə AFFA rəhbərliyinə "Bakı"ya göstərdikləri köməyə görə təşəkkürümü bildirirəm. Xüsusilə də Rövnəq Abdullayevlə Elxan Məmmədova. Ölkədən kənarda olarkən qolf federasiyası ilə münaqişə barədə mətbuatın yazdıqları ilə tanış oldum. "Bakı"nın bazası bundan öncə də əksər komandaların məşq və oyunlarına ev sahibliyi edib, bundan sonra da elə olacq. Bu baza təkcə komandamızın yox, bütövlükdə Azərbaycan futbolunun inkişafı yönündə önəmli rol oynayır. Belə bir vəziyyətdə bazanın daha yaxşılaşmasına kömək etmək lazımdır, daha onu pis günə qoymağa çalışılmamalıdırlar. Əgər kimsə bazamızda, stadionumuzda problemlər yaratmağa çalışır, o, Azərbaycan idmanına qarşı çıxır.
