Mirhüseyn Seyidov: AZAL Bakcell Arenaya müdafiədə oturmağa gəlmişdi
"Neftçi"nin yarımmüdafiəçisi Mirhüseyn Seyidovun azerisport.az saytına müsahibəsi
- AZAL-la ilk kubok oyunu barədə nə deyə bilərsiniz?
- Kubok oyunları iki görüşdən ibarət olur. AZAL bu oyunda axıradək bağlı futbol oynadı. Biz qol vurmaq, qələbə qazanmaq istəyirdik. Amma əsas odur ki, qol buraxmadıq.
- "Neftçi"nin fəqlənə bilməməsinə nə səbəb oldu?
- Sadəcə, rəqib öz qapısına daha yaxın oynadı. Onlar bura müdafiə olunmaq üçün gəlmişdilər. Çox səhv buraxmadılar. Artıq hər şey cavab oyununa qaldı. Düzdür, işimizi çətinləşdirdik, amma cavab oyununda mərhələ adlamaq üçün yaxşı şansımız var.
- Yarımfinala çıxacağınıza inam var?
- Qış fasiləsindən sonra AZAL-la üç oyun keçirmişik. Onlarla oynamağın necə çətin olduğunu bilirik. Səfərdə onlara qalib gəlmişik. İndi bunu yenidən təkrarlamalıyıq.
- Flavinyo və Vobayın start heyətdə yer almaması oyununuza təsir etdi?
- Bu, baş məşqçinin qərarı idi. Kimin oynamasının fərqi yoxdur. Əsas, verilən tapşırıqları yerinə yetirmək idi.
- "Neftçi" bu mövsüm mükafatsız qalsa, bu, komanda üçün faciə olmayacaq?
- Bəli. Amma çempionatda da şansımız hələ qalır. Bizim "İnter"lə də oyunumuz var. Mübarizəni sonadək davam etdirəcəyik. Kim bilir, bəlkə "Qarabağ" da xal itirəcək.
- "Qarabağ"ın "Qəbələ"yə məğlubiyyəti çempionatda intriqanı artırdı?
- Əlbəttə. "Qəbələ"nin qələbəsi bizim üçün düşərli oldu. Artıq xal fərqi 7-yə enib. İndi bizə "Qarabağ"la oyunda bu fərqi daha da azaltmaq qalır.
- "Neftçi"də qol vəziyyətlərindən yararlanmaqla bağlı problem var?
- Bəli. Amma buna görə kimisə günahlandırmaq lazım deyil. Zədəli futbolçularımız var. Nfor oynamır. Bütün yük Kanalesin üstünə düşüb.
- Klub prezidenti Sadıq Sadıqov oyunlarınıza gəlmir. Niyə?
- Biz onunla bazada hər gün görüşürük. Onun oyunlarımıza televizordan da baxmaq imkanı var. Əsas odur ki, onun dəstəyini hiss edirik.
