Kamran Ağayev: Növbəti oyunda meydana çıxmalıyam
Azərbaycan yığmasının və Türkiyənin "Kayserispor" klubunun qapıçısı Kamran Ağayevin azerisport.az saytına müsahibəsi
- Türkiyədəki işləriniz necə gedir?
- Son dövrlər komandanın nəticələri elə də ürəkaçan deyil. Baxmayaraq ki, liderliyimiz hələ də davam edir.
- Əsas qapıçınız son turlarda çox qol buraxır. Amma sizə yenə də şans vermirlər...
- Mənim kiçik zədəm var idi. Buna görə xeyli müddət idi normal məşq edə bilmirdim. Artıq hər şey arxada qalıb və qaydasındayam.
- Komandanız martın 9-da "Bucaspor"la oynayacaq. Sizi bu görüşdə əsas heyətdə görə bilərik?
- Əgər zədəm olmasa, növbəti turda meydana çıxmalıyam. Amma istənilən halda hər şeyə baş məşqçi qərar verir.
- Yığmanın baş məşqçisi Robert Prosineçki ötən tur Mahir Şükürovlu "Karşıyaka"nın, Vaqif Cavadovlu "Boluspor"un oyununu canlı izlədi. Xorvatiyalı təsadüfən Kayseriyə də gəlməyib?
- Xeyr.
- Yığmamızın Türkiyə toplanışını izləyirdiniz?
- Mətbuat vasitəsilə xəbər tutmağa çalışırdım. Ukrayna "Şaxtyor"u ilə oyuna baxa bilmədim. Çünki həmin vaxt məşqimiz vardı. Amma oyunun epizodlarına baxmıaşm. Təəssüf ki, məğlub olmuşuq. Halbuki, qələbə qazanmaq üçün də şans var idi.
- Malta ilə seçmə mərhələ oyununa dəvət gözləyirsiniz?
- Əgər dəvət etsələr, böyük məmnuniyyətlə gələcəyəm.
- Amma siz klubunuzda oynamırsınız. Sizcə, məşqçilər korpusu buna rəğmən sizə dəvət göndərər?
- Səhv etmirəmsə, Portuqaliya ilə oyundan öncə bir neçə ay idi oynamırdım. Amma Berti Foqts məni meydana buraxdı. Fikrimcə, normal oynadım. Dəvət etsələr sağ olsunlar, etməsələr, uğurlar! Ümid edirəm ki, qələbə qazanacağıq. Amma hazrda Türkiyə çempionatında və ya kubokunda uğur qazanmaq barədə düşünürəm.
