Dmitri Bezotosnı: Biz başqa ölkədən gəlmişik və robot deyilik
"Qəbələ"nin qapıçısı Dmitri Bezotosnının azerisport.az saytına müsahibəsi
- Çempionatın liderinə qarşı oyunla bağlı nə deyə bilərsiniz?
- Çox çətin oyun alındı. Amma yaxşı ki, qələbə ilə başa vurmağı bacardıq. Biz baş məşqçi Roman Qriqorçukun bütün tapşırıqlarını meydanda yerinə yetirməyə çalışdıq. Nəticədə də qalib gəldik.
- Oyundan öncə "Qarabağ"ı necə təsəvvür edirdiniz?
- Güclü komanda olduğunu bilirdim. Çox sürətli və texnikalı oyunçuları var. Qriqorçuk rəqibi yaxşı analiz etmişdi. Bu üzdən rəqibin necə oynayacağını bilirdik. "Qarabağ" Avropa Liqasında da yaxşı çıxış etmişdi.
- Qapıçının komandanın yarısı olduğu bildirilir. Bu qələbədə sizin nə dərəcədə payınız var?
- Təkcə mən yox, komandam da qol buraxmadı. Çünki hücumçular, yarımmüdafiəçilər, müdafiəçilər yaxşı müdafiə olundular. Birgə hücum edib, birgə müdafiə olunurduq. Fikrimcə, mənə yox, komandaya minnətdar olmaq lazımdır. Səhvlər də az idi. "Qarabağ"ın çox az qol şansı oldu.
- Əsas odur ki, Reynaldonu dayandıra bildiniz...
- Onun rəqib komanda üçün necə böyük əhəmiyyət daşıdığını bilirdik. "Qarabağ"ın son üç oyununa baxmışdıq və bilirdik ki, o, rəqib qapılarına vacib qollar vurub. Reynaldonun əla hücumçu olduğunu bildiyimiz üçün yaxşı hazırlaşmışdıq.
- Klubunuzun bir nömrəsi olduğunuzu demək olar?
- Hər bir qapıçı üzərində çalışır və öz şansını gözləyir. Kimin oynamasına isə baş məşqçi qərar verir.
- Bəzi mətbuat orqanları ukraynalı legionerlərin komandaya fayda vermədiyini düşünür...
- Gəlin çempionatın başa çatmasını gözləyək. Biz başqa ölkədən gəlmişik. Mövsümün sonunadək nə olacağını yaşayıb görəcəyik. "Qəbələ"də yeni kollektiv formalaşdırılıb. Biz də robot deyilik. Adaptasiya üçün vaxt lazımdır.
- Komandanızı qarşıda "Simurq"la kubok oyunu gözləyir...
- Biz artıq bu komanda ilə çempionatda görüşmüşük və məğlub olmuşuq. Ciddi rəqibdir. Amma onların da bizim haqda eyni fikirdə olduqlarına əminəm. İlk oyunda yaxşı nəticə qazanmağa çalışmalıyıq. İlk növbədə də qələbə. Klubun bu mövsüm üçün öz hədəfləri var.
