Maksim Medvedev: Qurban Qurbanov da gördü ki, bəxtimiz gətirmədi

"Qarabağ"ın müdafiəçisi Maksim Medvedevin azerisport.az saytına müsahibəsi

- "Qəbələ"yə məğlubiyyətlə bağlı nə deyə bilərsiniz?
- Maraqlı oyun alındı. Uşaqlar xeyli müddət idi birgə deyildi. İlk yarıda çətinliklərimiz oldu. Oyun istədiyimiz kimi getmirdi. İkinci hissədə isə vəziyyəti düzəltdik, öz oyunumuzu göstərdik. Qol vurmaq üçün şanslar var idi, amma yararlana bilmədik. Təəssüf ki, bu oyunda məğlubiyyətlə üzləşdik.

- Ola bilər ki, komandada arxayınlıq yaranıb?
- Xeyr, bundan söhbət gedə bilməz. Yığmanın düşərgəsindən qayıdan futbolçularda yorğunluq var idi. Bəziləri fərdi məşq edirdi.

- Yığma oyunçularının dünən gəlib, bu gün oyuna çıxması nə dərəcədə düzgün idi?
- Bildiyim qədərilə, onlar ayın 26-da gəlmişdilər. İki gün istirahət imkanı var idi. Bunun böyük problem yaratdığını düşünmürəm. Sadəcə, psixoloji yorğunluğun təsiri ola bilər. Hansısa problem axtarmağa dəyməz. Biz 6-7 oyun idi ardıcıl qələbə qazanırdıq. Bu dəfə uduzduq. Qarşıdakı oyunlarda vəziyyəti düzəltməliyik.

- "Qarabağ"ın məğlubiyyətindən əsas izləyiciləri - "İnter"lə "Neftçi" maksimum yararlandı...
- Mən bu münasibətlə onları təbrik edirəm. Düzdür, fərq azaldı. Amma ikinci yerdə gedən "İnter"lə altı xallıq fərqimiz var. Bu komandalarla iki oyunumuz var. Həmin oyunlara ciddi hazırlaşmalıyıq.

- Sizin bu məğlubiyyətinizin çempionatdakı intriqanı artırdığını demək olar?
- Hə. Biz fərqi çoxaldan kimi hamı "Qarabağ"ı erkən çempionluq münasibəti ilə təbrik edirəm. Bu isə bizim xoşumuza gəlmir.

- Amma təsir edir...
- Azarkeşlər qışqırır ki, çempionuq, mətbuat yazır ki, çempion artıq bəllidir. Əlbəttə, bu fikirlr müəyyən oyunçularda arxayınlığa səbəb ola bilər.

- Qurban Qurbanov arxayınlaşmamağınız üçün nəsə deyir?
- "Qəbələ" ilə oyundan sonra yaxşı çıxış etdiyimizi dedi. O, özü də görür ki, bəxtimiz gətirmədi.