Aleksey Qay: Qəbələ hələ istədiyi səviyyəyə çatmayıb
"Qəbələ"nin yarımmüdafiəçisi Aleksey Qayın azerisport.az saytına müsahibəsi
- "Qarabağ"la oyun barədə nə deyə bilərsiniz?
- Bu qələbəni sözlə ifadə etmək çətindir. Fikrimcə, bu 3 xal bizə böyük emosiya bəxş etdi və gələcəyə optimist baxmağa imkan verir.
- Bu oyunu Azərbaycandakı karyeranızın ən yaxşısı saymaq olar?
- Mən hər şeyi "Qarabağ"a bağlamaq istəməzdim. Aydın məsələdi ki, bu, Azərbaycan futbolunun lidelərindən biridir, son çempiondur. Amma bizim üçün hər şeydən vacib öz komandamızın oyunudur. Mənim üçün bu oyun artıq keçmişdə qalıb və növbəti oyun barədə düşünməyə başlamışam.
- İki ardıcıl qələbədən sonra turnir cədvəlindəki mövqeyinizə nəzər salmağa vaxtınız olub?
- Biz əvvəlki oyunlarda uğursuz çıxış etsək də, həmişə baş məşqçimizin tələb etdiyi kimi oynamağa çalışırdıq. Hər şey öz əlimizdədir. "Qarabağ" üzərindəki qələbə də sadəcə, növbəti oyunlarda uğurlu çıxış etmək üçün stimuldur.
- Bu, Roman Qriqorçukun görmək istədiyi "Qəbələ"dir?
- Ən yaxşı olmaq yolunda sərhəd yoxdur. Amma bu, bizim çatmaq istədiyimiz səviyyə deyil. Son qələbələrə baxmayaraq, "Qəbələ" daha da artırmalıdır.
- "Qarabağ"ın heyətində kimi fərqləndirə bilərsiniz?
- Mən liderin heyətində heç kimi fərqləndirməyəcəyəm. "Qəbələ"nin komanda olaraq bir-birini başa düşən futbolçularını vurğulamaq istərdim.
- Qarşıda Azərbaycan kubokunun "Simurq"la 1/4 final oyunu var...
- Kubok oyunları ayrıca tarixçədir. Bizi iki çətin oyun gözləyir. "Simurq"un gücünə bələdik. Onların bizi Premyer Liqada məğlub etməsi heç nə demək deyil. Biz həmin görüşdəkindən daha yaxşı çıxış etməyə çalışacağıq.
- Qriqorçuk mətbuat konfransında özü ilə gətirdiyi legionerlər barədə sualları cavablandırmağın xoş olmadığını söylədi...
- Mənim özümə də maraqlıdır ki, belə suallar haradan çıxır. Baş məşqçi mənim oyunumdan razıdır.
- Bəs özünüz?
- Mən heç vaxt öz oyunumdan razı qalmıram. Həmişə daha yaxşısına çalışıram. Məni sevindirən məqamlar var. Amma üzərində çalışmalı olduğum məqamlar da az deyil. Bu, təkcə mənə yox, bütöv komandaya da aiddir.
