Roman Qriqorçuk: Ümid edirəm ki, Qəbələ Qarabağa qarşı daha yaxşı oyun sərgiləyəcək

"Qəbələ"nin baş məşqçisi Roman Qriqorçukun azerisport.az saytına müsahibəsi

- "Qarabağ"la oyuna hazırlıq necə gedir?
- Bu komandanın yüksək reytinqə malik olduğundan xəbərimiz var. Ötən il onlar Avropa Liqasında böyük uğura imza atdılar. Biz də bu komandaya böyük hörmətlə yanaşırıq. Rəqibin necə ciddi komanda olduğunu bilirik və bu, bizim üçün böyük test olacaq.

- Bəs nəyə ümid edirsiniz?
- Müsbət nəticəyə.

- İndiki zamanda bu, mümkündür? Axı "Qəbələ" ideal formadan çox uzaqdır...
- İnanırıq ki, vəziyyətdən gündən günə daha da yaxşılaşacaq. "Xəzər Lənkəran"la son oyunumuz uğurlu alındı. Ümid edirəm ki, komanda "Qarabağ"la görüşdə daha yaxşı çıxış edib, müsbət nəticəyə imza ata biləcək.

- Azərbaycan yığmasına dəvət olunmuş futbolçuların hansı vəziyyətdə dönəcəyinə ümid edirsiniz?
- Bu, təbii prosesdir. Yığma oyunçularının arabir sərəncamımızda olmaması normaldır. Onlar yığmada özlərini yaxşı tərəfdən göstərməklə yanaşı, klubun düşərgəsinə də qaydasında dönməyə çalışmalıdırlar. Bu, futbolçu həyatıdır. Öz güclərini düzgün paylaşdırmalıdırlar.

- Yığmamızın Ukrayna "Şaxtyor"u ilə oyununa baxa bildiniz?
- Yayım səviyyəsi aşağı olduğuna görə baxa bilmədim. Amma insanların oyun və Robert Prosineçki barədə fikirlərindən belə nəticəyə gəldim ki, pis oyun alınmayıb.

- Nəticə özü sizə nə deyir?
- Başa düşürəm ki, burada yığmadan söhbət gedir və belədə hamı ilk növbədə nəticəni düşünür. Amma hesab edirəm ki, yoxlama oyunu olduğuna görə nəticə normaldır. Əsas baş məşqçinin istədiyi futbolu sərgiləməkdir. Çünki qarşıda millinin Malta ilə rəsmi oyunu var. Əsas həmin oyuna yaxşı hazırlaşmaqdır. Bu üzdən də mən yoxlama oyunundakı nəticəyə diqqət yetirməzdim.